شەتەلدىك اسكەري وقۋ ورىندارىنا قۇجات قابىلداۋ تامىزدا باستالادى

نۇر- سۇلتان. قازاقپارات - قورعانىس مينيسترلىگىنىڭ وكىلدەرى قازاقستاننىڭ اسكەري قورعانىس ماماندارى قاي ەلدەردە ءبىلىم الىپ جۇرگەنىن ايتتى، دەپ حابارلايدى قازاقپارات.

قورعانىس ءمينيسترىنىڭ ورىنباسارى تيمۋر داندىبايەۆتىڭ ايتۋىنشا، نەگىزگى ماماندىقتاردىڭ كوبى قازاقستاننىڭ وزىندە دايىندالادى. شەتەلدە تەك سيرەك ءارى تاپشى ماماندىق يەلەرىن وقىتۋ جولعا قويىلعان.

«نەگىزىندە كوپتەگەن ماماندىقتاردى وزىمىزدە دايىندايمىز. ءبىراق ءبىر ەرەكشە ءبىر ءتىزىم بار. اسا تاپشى ماماندىقتار بويىنشا شەتەلگە جىبەرۋگە ءماجبۇرمىز. كيبەرقاۋىپسىزدىك، گيدروگرافيا، ينجەنەرلىك- ساپەرلىك، اۋە شابۋىلىنا قارسى كۇرەس ماماندىقتارى بويىنشا مامانداردى شەتەلدە دايىنداۋ باعىتىندا جۇمىس ىستەپ جاتىرمىز»، - دەدى تيمۋر داندىبايەۆ.

اسكەري ءبىلىم جانە عىلىم دەپارتامەنتىنىڭ باستىعى تالعات قاليشيەۆتىڭ ايتۋىنشا، اتالعان ماماندىقتى مەڭگەرۋشىلەر كوبىنە ىرگەلەس مەملەكەتتەردى تاڭدايدى.

«قازىرگى ۋاقىتتا رەسەي فەدەراتسياسىندا، بەلارۋس، ارمەنيا، قىتاي، تۇركيا، ا ق ش، ءۇندىستان، پاكىستان جانە باسقا دا ەلدەردە قازاقستاننىڭ ازاماتتارى اسكەري ءبىلىم الىپ جاتىر. ول وقۋ ورىندارىنا ءتۇسۋ ءۇشىن قورعانىس ءمينيسترىنىڭ №371 بۇيرىعى بار. بيىلعى قابىلداۋ مەرزىمى تامىز ايىندا بولاتىنىن ايتقىم كەلەدى»، - دەدى تالعات قاليشيەۆ.

اۆتور: ەسىمجان ناقتىباي