اتاۋلى الەۋمەتتىك كومەك مولشەرى قالاي ەسەپتەلەدى

نۇر-سۇلتان. قازاقپارات - ق ر ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك كومەك ساياساتىن دامىتۋ دەپارتامەنتىنىڭ ديرەكتورى اسقار نيازوۆ اتاۋلى الەۋمەتتىك كومەك مولشەرى قالاي ەسەپتەلەتىندىگىن ءتۇسىندىردى، دەپ حابارلايدى قازاقپارات ءتىلشىسى.

«اتاۋلى الەۋمەتتىك كومەك كىرىسى تومەن وتباسىلارعا بەرىلەدى. ياعني، وتباسىنىڭ جان باسىنا شاققانداعى كىرىسى ەڭ تومەنگى كۇنكورىستىڭ 70 پايىزىنان تومەن بولۋى ءتيىس. ەڭ تومەنگى كۇنكورىستىڭ 70 پايىزى - بۇل كەدەيشىلىك شەگى. ياعني، اتاۋلى الەۋمەتتىك كومەك مولشەرى كەدەيشىلىك شەگى مەن وتباسىنىڭ ءاربىر مۇشەسىنە شاققانداعى كىرىستىڭ ايىرماسى ارقىلى انىقتالادى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

وسى رەتتە دەپارتامەنت باسشىسى اتاۋلى الەۋمەتتىك كومەك مولشەرىن ناقتى مىسال كەلتىرە وتىرىپ اتاپ بەردى.

«ماسەلەن، وتباسىدا 3 بالا جانە اكەسى مەن اناسى بار دەلىك. اتا-انالاردىڭ ءبىرى بالا كۇتىمىنە بايلانىستى دەمالىستا، ال وتباعاسى جۇمىس ىستەيدى. ءبىراق، جالاقىسى 50 مىڭ تەڭگە عانا. دەمەك، وتباسىنىڭ ءاربىر مۇشەسىن شاققاندا اي سايىنعى كىرىس 10 مىڭ تەڭگەدەن اينالادى. مۇنداي جاعدايدا بىزدەگى كەدەيشىلىك شەگى 24012 تەڭگەنى قۇرايدى. بۇل رەسپۋبليكا بويىنشا ورتا دەڭگەي. ويتكەنى، كەدەيشىلىك شەگىن ءاربىر ءوڭىر ايماق ءومىرىنىڭ ەكونوميكالىق دەڭگەيىنە بايلانىستى دەربەس ايقىندايدى. وسىنداي جاعدايدا اتاۋلى الەۋمەتتىك كومەكتىڭ ورتاشا مولشەرى وتباسىنىڭ ءاربىر مۇشەسىنە 14 مىڭ تەڭگەدەن اينالادى. 5 ادامعا اي سايىن شامامەن 70 مىڭ تەڭگە تولەنەدى. اتاۋلى الەۋمەتتىك كومەك مولشەرى ناقتى بەكىتىلمەگەن. ول وتباسىنىڭ كىرىسىنە بايلانىستى»، - دەدى اسقار نيازوۆ.

اۆتور: مارلان جيەمباي