الەمدىك رەيتينگتەردە جوعارلاعان جانىبەك گولوۆكين سالماعىنداعى چەمپيونداردى ايقاسقا شاقىردى

نۇر-سۇلتان. قازاقپارات - ورتا سالماقتاعى قازاقستاندىق بوكسشى جانىبەك ءالىمحان ۇلى (10-0، 6 ك و) ءوز ديۆيزيونىنداعى چەمپيونداردى جەكپە-جەككە تاعى شاقىردى، دەپ حابارلايدى Vesti.kz.

بۇل جولى جانىبەك تۆيتتەر جەلىسىندە بەلبەۋى بار ءۇش بوكسشى - دجەرمالل چارلو (WBC)، دەمەتريۋس اندرادە (WBO) جانە ريوتا مۋراتامەن (WBA Super) فوتوكوللاج جاساپ، «وڭاي جۇمىس» دەپ جازبا قالدىرىپتى.

قازاق بوكسشى كەيىنگى جەكپە-جەگىندە الەمنىڭ بۇرىنعى چەمپيونى امەريكالىق روب برانتتى (26-3، 18 ك و) جەڭدى. وسىنىڭ ارقاسىندا ول WBO رەيتينگىندە ەكىنشى، ال WBC تىزىمىندە ءۇشىنشى بولدى.

ورتا سالماقتا IBF جانە IBO چەمپيونى وزگە قازاقستاندىق بوكسشى گەننادي گولوۆكين (41-1-1، 36 ك و) ەكەنىن ايتا كەتەيىك.