قىرعىز-تاجىك شەكاراسىندا اتىس بولدى

نۇر-سۇلتان. قازاقپارات - قىرعىزستان مەن تاجىكستان شەكاراسىندا تاعى دا قاقتىعىس بولدى، دەپ حابارلايدى قازاقپارات ەكى ەلدىڭ اقپارات كوزدەرىنە سىلتەمە جاساپ.

قىرعىزستاندىق كابار اگەنتتىگىنىڭ مالىمەتىنە سەنسەك، 8- شىلدە كۇنى 17.00 كەزىندە مەملەكەتتىك شەكارادا قىرعىزستان مەن تاجىكستان شەكارا قىزمەتىنىڭ اسكەريلەرى اراسىندا اتىس بولعان.

«قىرعىز شەكارا جاساعى باتكەن وبلىسى لايلەك اۋدانى ناۋمينا اسۋىنداعى مەملەكەتتىك شەكارادا قىزمەتىن اتقارىپ جۇرگەن. ءتيىستى باعىتپەن كەلە جاتقاندا، چاشماگيلدان اسۋىندا ولارعا اياق استىنان تاجىك شەكاراشىلارى شابۋىل جاساعان. ەكى ەلدىڭ اسكەريلەرى اراسىندا اتىس بولعان» دەلىنگەن ق ر شەكارا قىزمەتى تاراتقان حابارلامادا.

وقيعادان زارداپ شەككەندەر تۋرالى اقپارات ناقتىلانىپ جاتىر. جاعدايدىڭ جاي-جاپسارىن انىقتاۋ ءۇشىن وقيعا ورنىنا ق ر مەملەكەتتىك ۇلتتىق قاۋىپسىزدىك كوميتەتى شەكارا قىزمەتىنىڭ باتكەن وبلىسى بويىنشا باسقارما باستىعى، پولكوۆنيك كىيالبەك تولونبايەۆ، كۇش قۇرىلىمدارىنىڭ باسشىلارى اتتانعان.

ەكى ەلدىڭ شەكارا قىزمەتىنىڭ وكىلدەرى اتالعان فاكتى بويىنشا تەكسەرۋ جۇرگىزىپ جاتىر.

بۇگىن سونداي-اق تاجىكستاندىق حوۆار اگەنتتىگى ەلدىڭ شەكارا قىزمەتىنىڭ وسى جاعدايعا قاتىستى تاراتقان حابارلاماسىن جاريالادى.

وعان سەنسەك، 8- شىلدە كۇنى جەرگىلىكتى ۋاقىتپەن ساعات 14.55 كەزىندە 4 قىرعىز شەكاراشىسى سوعدى وبلىسى ديەۆاشتيچ اۋدانى روسروۆۋت دەگەن جەردە تاجىك شەكاراسىن زاڭسىز كەسىپ وتكەن.

ولار اسكەري جانە كادىمگى كيىم كيگەن. قولدارىندا كالاشنيكوۆ اۆتوماتى بولعان. ولار ديەۆاشتيچ اۋدانى تۇرعىندارىنا تيەسىلى 9 جىلقىنى قىرعىزستان اۋماعىنا الىپ كەتۋ ءۇشىن كەلگەن. ولار تاجىك شەكاراشىلارىنىڭ مەملەكەتتىك شەكارانى كەسىپ وتپەۋ تۋرالى ەسكەرتپەسىنە قۇلاق اسپاي، اۆتوماتتان وق جاۋدىرعان.

بۇعان تاجىك شەكاراشىلارى دا وق اتىپ، جاۋاپ بەرگەن. ودان شەكارانى زاڭسىز كەسىپ وتكەندەردىڭ ەكەۋى جاراقات الدى.

«قازىرگى تاڭدا قوس مەملەكەتتىڭ قۇزىرلى ورگان وكىلدەرى وقيعا ورنىنا كەلىپ، قاقتىعىستىڭ ءمان-جايىن انىقتاپ جاتىر» دەپ جازادى حوۆار.