اقتاۋدا «قازاقستان بارىسى» تۋرنيرىنىڭ قولا جۇلدەگەرىنە پاتەر بەرىلدى

اقتاۋ. قازاقپارات - بۇگىن ماڭعىستاۋ وبلىسىنىڭ اكىمى سەرىكباي ترۇموۆ «قازاقستان بارىسى» رەسپۋبليكالىق تۋرنيرىنە ءوڭىر اتىنان قاتىسقان نۇرداۋلەت جارىلعاپوۆ پەن جاسۇلان تاڭاتوۆتى جانە قازاق كۇرەسىنەن جاتتىقتىرۋشى قايرات بۋرباسوۆتى قابىلدادى، دەپ حابارلايدى قازاقپارات ءتىلشىسى.

سەرىكباي ترۇموۆ قر تۇڭعىش پرەزيدەنتى - ەلباسى ن. ءا. نازاربايەۆتىڭ جۇلدەسى ءۇشىن قازاق كۇرەسىنەن وتكەن «قازاقستان بارىسى» رەسپۋبليكالىق تۋرنيرىندە قولا جۇلدەگە يە بولعان ن. جارىلعاپوۆ پەن ونىڭ باپكەرىن ايتۋلى جەڭىسپەن قۇتتىقتادى.

«ەلىمىزدىڭ ءار وڭىرىنەن ىرىكتەلگەن كىل مىقتىلاردىڭ ىشىنەن سۋىرىلىپ شىعىپ، جۇلدەلى ورىندى يەلەنگەن نۇرداۋلەتتىڭ جەڭىسى ءبىز ءۇشىن ماقتانىش.

«قازاقستان بارىسى» باستالعالى 10 جىلدا ماڭعىستاۋ قورجىنىنا العاش رەت جۇلدە تۇسكەن ەكەن. نۇرداۋلەت جارىلعاپوۆتىڭ جەڭىستى جولى جالعاسا بەرسىن. وسى جىلى ماڭعىستاۋ وبلىسىنىڭ سپورتشىلارى ءتۇرلى دەڭگەيدەگى جارىستاردا وتە جاقسى دارەجەدە ونەر كورسەتتى. بۇل جەتىستىكتەردىڭ بارلىعى ءبىزدىڭ وبلىسىمىزدىڭ دەنە شىنىقتىرۋ جانە سپورت سالاسىنىڭ دامۋىنا جاڭا قارقىن بەرەتىنىنە سەنەمىز. سىزدەردىڭ سپورتتاعى الار اسۋلارىڭىز ءالى دە بيىك بولۋىنا تىلەكتەسپىز. ءبىز سپورتشىلارىمىزعا ۇلكەن سەنىم ارتامىز. جەڭىستەن جەڭىسكە جەتە بەرىڭىزدەر!»، - دەدى وبلىس اكىمى س. ترۇموۆ.

وبلىس اكىمى ماڭعىستاۋلىقتاردىڭ اتىنان ن. جارىلعاپوۆقا - اقتاۋ قالاسىنان پاتەر، ال ونىڭ جەكە باپكەرى قايرات بۋرباسوۆقا 1 ميلليون تەڭگەنىڭ سەرتيفيكاتىن تابىس ەتتى.

ەل تاۋەلسىزدىگىنىڭ 30 جىلدىعى، قاجىمۇقان مۇڭايتپاس ۇلىنىڭ 150 جىلدىعىن مەرەكەلەۋ اياسىندا وتكىزىلگەن تۋرنيرگە رەسپۋبليكانىڭ 14 وبلىسىنان، الماتى، شىمكەنت، نۇر-سۇلتان قالالارىندا ىرىكتەۋدەن وتكەن 37 ۇزدىك بالۋان قاتىسقان.