ۆاكسينا العان ادام قاشان دونور بولا الادى

نۇر-سۇلتان. قازاقپارات - كوروناۆيرۋسقا قارسى ۆاكسينا العان دونور بولا الا ما؟

بۇل سۇراققا ورتالىق كوممۋنيكاتسيالار قىزمەتىندە دەنساۋلىق ساقتاۋ ءمينيسترىنىڭ ءبىرىنشى ورىنباسارى مارات شورانوۆ جاۋاپ بەردى، دەپ حابارلايدى قازاقپارات.

«جالپى ۆاكسينا العان ادامنىڭ دونور بولۋىنا ەشقانداي شەكتەۋ جوق. تەك ءبىر عانا شەكتەۋ بار. ەكپە العاننان كەيىن ەكى اپتانىڭ ىشىندە دونور بولۋعا بولمايدى. ال جالپى عالىمداردىڭ مالىمەتى بويىنشا ونداي شەكتەۋلەر جوق»، - دەدى ۆيتسە مينيستر.

وسى شارادا سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا ۆاكسينا العان قازاقستاندىقتاردىڭ 0,05 پايىزى قايتا ىندەت جۇقتىرعانىن ايتتى.

«ۆاكسينالارعا جىكتەپ ايتساق، «سپۋتنيك V» بويىنشا 2024 جاعداي انىقتالدى. ءبىرىنشى كومپونەنت - 1190، ەكىنشى كومپونەنت - 834. QazVac بويىنشا 40 جاعداي تىركەلدى. سايكەسىنشە، 21 جانە 19. Hayat-Vax بويىنشا 140 (89/51) جانە CoronaVac بويىنشا 6 ادام ءبىرىنشى دوزادان كەيىن كوروناۆيرۋس جۇقتىرعان. وسىنىڭ ءبارىن قوسساڭىز 2212 جاعداي شىعادى. ءبىراق بۇل مالىمەتتى ابسوليۋتتى ساندار كولەمىندە قولدانۋ دۇرىس ەمەس دەپ ويلايمىن. بۇگىندە بىزدە 4 ميلليونعا جۋىق ادام ەكپە العان. سونىڭ 0,05 پايىزى ۆاكسينا العاننان كەيىن اۋىرعان دەگەن ءسوز»، - دەدى ايجان ەسماعامبەتوۆا.

اۆتور: ەسىمجان ناقتىباي