سەنات ءتوراعاسى قۋاڭشىلىق ماسەلەسىنە الاڭداۋشىلىق ءبىلدىردى
سەنات باسپا ءسوز قىزمەتىنىڭ حابارلاۋىنشا، الماتى وبلىسىنا جۇمىس ساپارى بارىسىندا شارۋالارمەن كەزدەسكەن سەنات سپيكەرى قازىرگى تاڭدا ەلىمىزدىڭ كەيبىر ايماقتارىندا قۇرعاقشىلىق بەلەڭ العانىن، سوعان بايلانىستى جەرگىلىكتى شارۋاشىلىقتار ايتارلىقتاي زارداپ شەگىپ وتىرعانىن ايتتى.
ول بۇل پروبلەماعا مەملەكەت باسشىسى دا نازار اۋدارىپ، ونى جەدەل شەشۋ ءۇشىن ءتيىستى ورگاندارعا ناقتى تاپسىرمالار بەرگەنىن تىلگە تيەك ەتتى.
«مەملەكەت باسشىسى رەفورمالار جونىندەگى جوعارى كەڭەستىڭ سوڭعى وتىرىسىندا مال شارۋاشىلىعىنا ايتارلىقتاي سالدارىن تيگىزىپ وتىرعان قۋاڭشىلىق ماسەلەسىنە نازار اۋداردى. قازىرگى تاڭدا بۇل - بۇكىل ەلدى الاڭداتىپ وتىرعان پروبلەما. سوندىقتان ءتيىستى مينيسترلىك وسى ماسەلەنى شەشۋ ءۇشىن بار كۇش- جىگەرىن جۇمساۋى كەرەك. بۇل جولدا جۇيەلى قادامدار قاجەت. اۋىل شارۋاشىلىعى مينيسترلىگى جەدەل تۇردە احۋالدىڭ سالدارىن تالداپ، جاعدايدى جان- جاقتى ساراپتاپ، ماسەلەنى شەشۋ جولدارىن ۇسىنۋعا ءتيىس»، - دەدى ماۋلەن اشىمبايەۆ.
سونىمەن قاتار پالاتا ءتوراعاسى سەناتورلار اۋىلدىق جەرلەردىڭ ينفراقۇرىلىمىن دامىتۋ، ۆەتەريناريا جانە ازىق- تۇلىك قاۋىپسىزدىگى ماسەلەلەرىن دە ءجيى كوتەرىپ كەلە جاتقانىن اتاپ ءوتتى.
ول بىلتىرعى بيۋدجەتتىڭ ورىندالۋى تۋرالى ۇكىمەتتىڭ ەسەبىن قاراۋ كەزىندە سەنات دەپۋتاتتارى اگرارلىق سالانى قارجىلاندىرۋداعى ولقىلىقتارعا نازار اۋدارعانىن ايتتى.
«اۋىل شارۋاشىلىعىنداعى نەگىزگى ماسەلەلەردىڭ ءبىرى سالانىڭ تولىق قارجىلاندىرىلماۋى بولىپ وتىر. مىسالى، 2020 -جىلى اگرارلىق سەكتورعا جوسپارلانعان قاراجاتتىڭ جارتىسىنان استامى عانا بولىنگەن»، - دەدى سەنات ءتوراعاسى.
سونداي-اق، الماتى وبلىسىنىڭ شارۋالارىمەن كەزدەسۋدە قۋاڭشىلىق ماسەلەسىن شەشۋدە جۇيەلى جۇمىس جۇرگىزۋ قاجەتتىگى، مۇنداي توتەنشە جاعدايعا دايىندىق ءاردايىم باستى نازاردا بولۋ كەرەكتىگى ايتىلدى.
اۆتور: مارلان جيەمباي
