قازاقستاندا لوكداۋن جاريالانۋى مۇمكىن بە

نۇر-سۇلتان. قازاقپارات - دەنساۋلىق ساقتاۋ ءمينيسترىنىڭ ءبىرىنشى ورىنباسارى مارات شورانوۆ قازاقستاندا لوكداۋن جاريالاۋ ىقتيمالدىعى تۋرالى پىكىر ءبىلدىردى، دەپ حابارلايدى قازاقپارات.

«ءبىزدىڭ جۇمىس توبىمىز جالپى ەپيدەميولوگيالىق احۋالعا سايكەس بولجامدارىن جاڭارتۋدا. كەلەسى ايدىڭ ىشىندە ناۋقاستاردىڭ سانى كوبەيەدى دەپ ەسەپتەپ وتىر. ونىڭ سانى پەسسيميستىك ستسەناريي بويىنشا قازىرگى جاعدايدان 2 ەسەگە دەيىن كوبەيۋى مۇمكىن. وزدەرىڭىز بىلەسىزدەر، ءبىز ءوز بولجامدارىمىزدى ءۇش ستسەناريي بويىنشا جاسايمىز. ەڭ ءبىرىنشى ماقساتىمىز - قازىرگى قالالىق اۋرۋحانالاردا توسەك- ورىن جۇكتەمەسىن كوبەيتپەۋ»، - دەدى ۆيتسە-مينيستر.

ب ا ق وكىلىنىڭ لوكداۋن جاريالاۋ ىقتيمالدىعى تۋرالى ساۋالىنا جاۋاپ بەرگەن ۆەدومستۆو وكىلى قازىر رەسپۋبليكا بويىنشا ستاتسيونارلىق توسەكتەردىڭ جۇكتەلىمى 37 پايىزعا جەتكەنىن اتادى.

«ءبىز توسەك جۇكتەمەسى بويىنشا ەرەجەلەردەن ءالى باس تارتىپ وتىرعان جوقپىز. سول ەرەجەنى مىندەتتى تۇردە ساقتايمىز. رەسپۋبليكا بويىنشا توسەك ورىنداردىڭ 37 پايىزى جۇكتەلگەن. ءوز باياندامامدا ايتىپ كەتكەندەي، 70 پايىزعا جەتكەن مەزگىلدە قوسىمشا توسەك ورىندارىن اشامىز. ال 70 پايىزدان كوتەرىلسە، سول كەزدە ارينە ونداي شەشىم قاراستىرۋ كەرەك» ، - دەدى مارات شورانوۆ.

ونىڭ ايتۋىنشا، سوڭعى اپتادا دەلتا شتامنىڭ تارالۋى وتكەن اپتاعا قاراعاندا رەسپۋبليكانىڭ بارلىق وڭىرلەرىندە ءوسىپ، سىرقاتتانۋ كورسەتكىشىنىڭ ءوسىمى 1,9 ەسە بولعان.