ءبىلىم مينيسترلىگى اعىلشىن ءتىلى وقۋلىعىنا قاتىستى داۋعا پىكىر ءبىلدىردى

نۇر-سۇلتان. قازاقپارات - الەۋمەتتىك جەلىدە اعىلشىن ءتىلى وقۋلىعىنىڭ گرەك جانە قازاقستاندىق نۇسقالارىنىڭ ۇقساستىعى تۋرالى اقپارات تارادى.

وسىعان بايلانىستى «وقۋلىق» رەسپۋبليكالىق عىلىمي- پراكتيكالىق ورتالىعىنىڭ ديرەكتورى ەلدوس نۇرلانوۆ پىكىر ءبىلدىردى، دەپ حابارلايدى قازاقپارات.

«الەۋمەتتىك جەلىلەردە اعىلشىن ءتىلى وقۋلىعىنىڭ گرەك جانە قازاقستاندىق نۇسقالارىنىڭ ۇقساستىعى تۋرالى اقپارات تارادى. بۇل وقۋلىقتىڭ گرەك نۇسقاسىنىڭ جوعىن بىردەن اتاپ وتكىم كەلەدى. Express Publishing باسپاسى ازىرلەگەن اعىلشىن ءتىلى وقۋلىعى العاش رەت ۇلىبريتانيادا 2013 -جىلى جارىق كوردى. Smiles وقۋلىقتار توپتاماسى حالىقارالىق ارەنادا مويىندالىپ، قازاقستان عانا ەمەس، گرەكيا، چەحيا، پولشا، يسپانيا، پورتۋگاليا، ساۋد ارابياسى، سەربيا، حورۆاتيا، ۋكراينا، بولگاريا، لاتۆيا مەن ليتۆا جانە ت. ب. ەلدەردە قولدانۋعا رەسمي تۇردە رۇقسات العان.

دەمەك، شەت ءتىلىن جەتىك مەڭگەرۋ ماقساتىندا سول ءتىلدىڭ وتانى ەسەپتەلەتىن مەملەكەتتىڭ ۇزدىك دەپ تانىلعان ادىستەمەسىن، وقۋلىقتارىن الىپ پايدالانۋ - الەمدىك تاجىريبەدە بار ءۇردىس. ءبىرقاتار ەلدە Smiles وقۋلىقتارى ءتۇپنۇسقادا قولدانىلا بەرەدى (حالىقارالىق نۇسقا). قازاقستانداعى نۇسقاسى مەملەكەتتىك جالپىعا مىندەتتى ءبىلىم بەرۋ ستاندارتىنا جانە اعىلشىن ءتىلى ءپانىنىڭ وقۋ باعدارلامالارىنا سايكەستەندىرىلىپ بەيىمدەلگەن. اتاپ ايتقاندا، وقۋلىق تاقىرىپتارى، وقۋ ماقساتتارى، يلليۋستراتسيالارى مەن وقۋ ماتەريالدارى ايتارلىقتاي وزگەرتىلدى. ناتيجەسىندە، وقۋلىقتا اۆتورلاردىڭ ادىستەمەلىك كوزقاراسى ساقتالا وتىرىپ، مازمۇنىنىڭ جارتىسىنا جۋىعى جاڭارتىلدى. حالىقارالىق جانە قازاقستاندىق وقۋلىقتار نۇسقالارىنىڭ ايىرماشىلىعىن ولاردىڭ تاقىرىپتارىنان بايقاۋ قيىن ەمەس (سۋرەتى تومەندە)» دەپ جازدى ورتالىق ديرەكتورى Facebook پاراقشاسىندا.

وقۋلىقتى تىكەلەي قولدانىپ جۇرگەن مۇعالىمدەر مەن وقۋشىلاردىڭ پىكىرىنشە، Smiles اعىلشىن ءتىلىن ۇيرەنۋدە ايتارلىقتاي ءتيىمدى.

مۇنى وقۋ پروتسەسىنەن بولەك، زياتكەرلىك سايىس ناتيجەلەرىنەن دە كورۋگە بولادى.

«ماسەلەن، 24-ماۋسىمدا باستاۋىش جانە نەگىزگى مەكتەپ اعىلشىن ءتىلى مۇعالىمدەرى مەن وقۋشىلارىنا ارنالعان رەسپۋبليكالىق بايقاۋعا 3,5 مىڭ ۇمىتكەر قاتىستى. بارلىق جۇلدەگەر Express Publishing باسپاسى ازىرلەگەن وقۋلىقتار مەن وقۋ- ادىستەمەلىك كەشەندەرى بويىنشا ءبىلىم الاتىندىقتارىن اتاپ وتكەن. Smiles وقۋلىقتارى مەن و ا ك «وقۋلىق» رەسپۋبليكالىق عىلىمي- پراكتيكالىق ورتالىعىنىڭ رەسمي پەداگوگيكالىق جانە لينگۆيستيكالىق ساراپتاماسىنىڭ وڭ قورىتىندىسىمەن قاتار (2016 -جىلى) ، «KazTEA» قازاقستان رەسپۋبليكاسىنىڭ اعىلشىن ءتىلى مۇعالىمدەرى مەن وقىتۋشىلارى اسسوتسياتسياسىنىڭ جوعارى باعاسىنا يە بولدى» دەپ اتاپ ءوتتى ەلدوس نۇرلانوۆ.

ايتا كەتەرلىگى، گرەكيادا بۇل وقۋلىقتىڭ بريتاندىق ءتۇپنۇسقاسى قولدانىلادى. الەۋمەتتىك جەلىلەردەگى پوست اۆتورلارى «گرەكتىكى» دەپ اتاعان ايقارما بەتتەر ءتۇپنۇسقادان الىنعان.

«ايقارمالار «Smiles magazine. Our World» (Smiles جۋرنالى. ءبىزدىڭ الەم) دەپ اتالاتىن ايدارعا جاتادى. ونداعى تاپسىرمالار ءۇش ءتۇرلى مەملەكەتتىڭ مادەني ەرەكشەلىكتەرىن سالىستىرۋ ارقىلى ماتەريالدى بەكىتۋگە ارنالعان.

مۇندا قازاقستاندىق كومپونەنت «تانىسۋ - سالىستىرۋ - قولدانۋ» ادىستەمەلىك قاعيداتى بويىنشا بەرىلگەن. ياعني، وقۋشى الدىمەن ماعلۇماتتى اعىلشىن ءتىلدى ەلدىڭ مىسالىندا وقيدى، سودان كەيىن ونى باسقا ەلمەن سالىستىرىپ بارىپ، رەسپۋبليكامىزعا قاتىستى مىسالمەن قورىتىندىلايدى» دەپ تۇيىندەدى ءسوزىن وقۋلىق» رەسپۋبليكالىق عىلىمي- پراكتيكالىق ورتالىعىنىڭ ديرەكتورى ەلدوس نۇرلانوۆ.