سۋعا شومىلىپ ءجۇرىپ كوروناۆيرۋس جۇقتىرۋ مۇمكىن بە
سانيتارلىق- ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆاعا ورتالىق كوممۋنيكاتسيالار قىزمەتىندە وسىنداي ساۋال قويىلدى، دەپ حابارلايدى قازاقپارات.
«بۇگىنگى تاڭدا كوروناۆيرۋستىڭ سۋ قابىلداۋ جولدارى ارقىلى جۇعاتىنى انىقتالماعان. ياعني، كوروناۆيرۋس سۋ ارقىلى بەرىلمەيدى. ءبىراق سونىمەن بىرگە، سىزدەردىڭ نازارلارىڭىزدى ءدال سول سۋ قويمالارىندا، ەگەر ارا قاشىق ساقتالماسا، جاپپاي ادامدار كوپ جينالاتىن جەرلەردە كوروناۆيرۋستى جۇقتىرۋ قاۋپى بار ەكەنىنە اۋدارعىم كەلەدى. ويتكەنى كوروناۆيرۋس اۋا ارقىلى تارالادى. ناۋقاس ادام ۇساق اۋا تامشىلارىن شىعارادى. بولشەكتەردىڭ مولشەرىنە بايلانىستى اۋا كوپىرشىگى ۇزاق ۋاقىت اۋادا قالىقتاپ ءجۇرۋى مۇمكىن. بۇل ءبىر شارشى مەتر اۋماققا تىم كوپ ادام جينالعان جاعدايدا جۇقتىرۋ فاكتورى»، - دەدى ايجان ەسماعامبەتوۆا.
بۇعان دەيىن سانيتارلىق- ەپيدەميولوگيالىق باقىلاۋ كوميتەتىنىڭ ءتوراعاسى پ ت ر كىمدەرگە تەگىن ەكەنىن ايتقان بولاتىن.
«باس مەملەكەتتىك سانيتارلىق دارىگەردىڭ قاۋلىسىمەن پ ت ر تەستىلەۋ تەگىن وتكىزىلەتىن ادامداردىڭ 12 ساناتى بەكىتىلگەن. بۇل كلينيكالىق بەلگىسى بار، ناۋقاسپەن بايلانىستا بولعان، جۇكتى ادامدار. باسقا تۇلعالارعا تەگىن پ ت ر تەست قاراستىرىلماعان. ۆاكسيناتسيا تەگىن، پ ت ر تەست مەملەكەت بيۋدجەتىنەن قارجىلاندىرىلماسا دا، قازاقستاندىقتاردىڭ ۆاكسيناتسيا مەن پتر تەستىڭ بىرەۋىن تاڭداۋعا قۇقىعى بار»، - دەدى كوميتەت باسشىسى.
