ساحارا ءشولىن كوگالداندىرۋ مۇمكىن بە؟
كەيدە وسىناۋ ءشول تىرشىلىك ورتاسىنا اينالىپ، تالاي جاننىڭ مەكەنى بولسا دەيسىڭ. «قۇم مەن قۇمايت جەردى كوگالداندىرۋعا مۇمكىندىك بار ما الدە جوق پا؟» دەگەن وي تاعى بار. ءشولدى كوگالعا اينالدىرا الامىز با الدە جوق پا - ونى ءبىز ساحاراعا قاراپ بىلەمىز.
ويتكەنى بۇل ماڭدا ادامزات تاريحىندا العاش رەت اۋقىمدى كوگالداندىرۋ جۇمىسى باستالعان. 30 ميلليون شارشى شاقىرىم اۋماققا كوشەت ەگىلىپ جاتىر. ەگەر ەگىلگەن تالدىڭ ءبارى ويداعىداي ءوسىپ شىقسا، وندا بۇل ماڭاي ورمانعا اينالماق.
افريكانىڭ 21 مەملەكەتى بىرىگىپ، «ۇلى جاسىل بەلدەۋ» جوباسىن قولعا الدى. جوبا بويىنشا سەنەگال ەلىنەن دجيبۋتي مەملەكەتىنە دەيىن 7775 شاقىرىم، ەنى 15 شاقىرىم بەلدەۋگە اعاش ەگىلەدى. 2030-جىلعا دەيىن اعاش وتىرعىزىلادى دەپ جوسپارلانعان. ازىرشە جالپى اعاشتىڭ 15 پايىزى ەگىلدى. ەگەر ەگىلگەن كوشەت ءوسىپ شىقسا، ناعىز ورمانعا، جاسىل بەلدەۋگە اينالماق. ونى ءتىپتى عارىشتان دا كورۋگە بولادى.
جالپى ءشول ايماققا تال ءوسىرىپ، كوگالداندىرۋعا، تەوريالىق تۇرعىدان بولادى. ونىڭ جولدارى دا بارشىلىق. ءبىراق مىنانى تۇسىنگەنىمىز ابزال.
ءشولدى ايماقتىڭ (ونىڭ ىشىندە ساحارا دا بار) باستى پروبلەماسى دا سول - سۋ جوق. ەگەر ينجەنەر كانالدارى ارقىلى ءشولدىڭ ىشىنە سۋ تارتىلسا، وندا ورمان ءوسىرۋ وپ-وڭاي. قازىر جاڭبىر سۋىن جيناۋ، مۇحيت سۋىن تۇشى سۋعا اينالدىرۋ ءارى ۇزاق جولعا جەتكىزۋ سىندى تەحنولوگيالار بارشىلىق.
قۇم سۋدى ۇستاپ تۇرا المايدى. سوندىقتان سۋ اكەلەردە توپىراقتىڭ بەتكى قاباتىن قاتايتىپ، بەكىتىپ، قۇم ەروزياسىن توقتاتۋ قاجەت. سول كەزدە قۇمنىڭ بەتىندەگى تەمپەراتۋرا تومەندەپ، قۇيىن، جەل مەن تورنودا ازايادى.
ءشولدى كوگالداندىرۋدىڭ، دالىرەك ايتساق، ساحارانى جاسىل جەلەككە اينالدىرۋدىڭ تاعى ءبىر جولى بار. ول - كۇن باتارەياسى مەن جەل گەنەراتورىن پايدالانۋ. وسى ماقساتتا ارنايى «ساحارا ورمانى» اتتى جوبا دا ۇسىنىلعان ەكەن. مامانداردىڭ ايتۋىنشا، ءشولدى جەرگە كۇن پانەلىن ورناتسا، كۇن ساۋلەسىنىڭ شاعىلىسۋى ازايادى. ال جەل گەنەراتورى بولسا، جەلدى بەلگىلى ءبىر باعىتتا ايداپ، جاڭبىر تۋعىزۋى مۇمكىن. ءبىراق بۇل جوبا ءالى قاعاز كۇيىندە جاتىر. ونى قولعا الۋ ءۇشىن كوپ قارجى كەرەك كورىنەدى.
massaget.kz
