قازاقستان مۇسىلماندارى ءدىني باسقارماسى بيىلعى قۇربان شالۋ ءراسىمىن ءتۇسىندىردى
قۇربان ايت شىلدە ايىنىڭ 20-22 ءسى كۇندەرىنە تۋرا كەلەدى. ءدىني باسقارمانىڭ مالىمدەۋىنشە، 2021-جىلى قۇربان شالۋ ءراسىمىن وتكىزۋ ەكى جولمەن جۇزەگە اسىرىلادى:
1) مەملەكەتتىك سانيتارلىق-ەپيدەميولوگيالىق قاداعالاۋ ورگاندارى تاراپىنان رۇقسات بەرىلگەن جەرگىلىكتى قاساپحانادا سانيتاريا ەرەجەسىن قاتاڭ ساقتاي وتىرىپ قۇربان شالۋ ءراسىمىن وفلاين رەجيمدە، ياعني ءداستۇرلى جولمەن ۇيىمداستىرۋ.
2) بۇگىنگى پاندەميا جاعدايىندا قۇربان شالۋشىعا قولايلى جاعداي جاساۋ جانە كومەككە مۇقتاج جانداردى قولداۋ ماقساتىندا وتكەن جىلدىڭ تاجىريبەسىن قولدانىپ، قۇربان شالۋ ءراسىمىن شاريعاتتاعى «وكىلدىك» قاعيداسىنا سايكەس qurban2021.kz سايتى ارقىلى ونلاين رەجيمدە جۇزەگە اسىرۋ.
«جوبانىڭ ماقساتى - قايىرىمدىلىققا دانەكەر بولۋ، حالىقتىڭ دەنساۋلىعى مەن ومىرىنە تونگەن قاۋىپتى سەيىلتۋگە ۇلەس قوسۋ، قۇربان شالۋعا نيەت بىلدىرگەن جاندارعا كارانتين جاعدايىندا وڭتايلى جول ۇسىنۋ. ەكىنشىدەن، كارانتين جاعدايىندا قالادا تۇرىپ جاتقان ازاماتتار ءۇشىن قاشىقتىقتان ءوز اتىنان قۇربان شالۋعا تاپسىرىس بەرۋ - وڭتايلى شەشىم»، دەلىنگەن حابارلامادا.
ق د م ب اۋىلدىق جەردە جەكە تۇرعىن ۇيدە تۇراتىن ءار ادامنىڭ مۇسىلماندىق مىندەتىن اتقارۋىنا ەشقانداي شەكتەۋ جوق ەكەنىن جەتكىزدى.
«حانافي ءمازھابىندا قۇربان ايت كۇندەرى باي ادامعا قۇربان شالۋ - ءۋاجىپ (مىندەت). شاريعاتىمىز بويىنشا «باي» دەپ مال-دۇنيەسى نيساپ مولشەرىنە جەتكەن ادامعا ايتىلادى.
نيساپ مولشەرى - 40 قوي (ەشكى)، 30 ءىرى قارا، 5 تۇيە نەمەسە قاجەتتىلىگىنەن ارتىق 85 گر التىن (1230000 تەڭگە) قاراجات. مال-دۇنيەسى نيساپ مولشەرىنە جەتپەگەن، ياعني جاعدايى تومەن مۇسىلمانعا قۇربان شالۋ مىندەت ەمەس»، دەلىنگەن حابارلامادا.
مۇقتاج وتباسىلار قۇرباندىق ەتىن الۋ ءۇشىن qurban2021.kz سايتى ارقىلى بيىل 20- شىلدە كۇنى ايت نامازىنان كەيىن ءوتىنىش بىلدىرە الادى. مۇقتاج وتباسىلاردىڭ ءوتىنىشىن قابىلداۋ، ساراپتاۋ جانە قۇرباندىق ەتىن جەتكىزىپ بەرۋمەن ق م د ب- نىڭ جەرگىلىكتى وكىلدىكتەرى اينالىسادى.
قۇرباندىققا شالىناتىن تۇلىك باعاسى جەرگىلىكتى نارىق باعاسىمەن كورسەتىلەدى. وسى ورايدا ەلىمىزدىڭ ءار ايماعىنداعى مالدىڭ باعاسى ءارتۇرلى ەكەنىن ەسكەرۋ قاجەت «سايت ارقىلى تاپسىرىس قابىلداپ، قۇرباندىق ەتىن كومەككە ءزارۋ جاندارعا تاراتۋ تاجىريبەسى ساۋد ارابياسى، تۇركيا، مالايزيا، يندونەزيا، بىرىككەن اراب امىرلىكتەرى سىندى ءبىرقاتار مۇسىلمان مەملەكەتتەرىندە بۇرىننان قالىپتاسقان جۇيە. بۇل جىل سايىن يگى داستۇرگە اينالعان. جوبانىڭ باستى ەرەكشەلىگى - قۇرباندىق ەتىن تۇگەلدەي مۇقتاج ازاماتتارعا تاراتۋ»، دەلىنگەن حابارلامادا.
