اتى اڭىزعا اينالعان ءۇندى اكتەرى قايتىس بولدى
باسىلىم مالىمەتىنە سۇيەنسەك، اكتەر جەرگىلىكتى ۋاقىت بويىنشا تاڭعى ساعات 7.30-دا ءۇندىستان استاناسىنداعى حار حيندۋدجا اۋرۋحاناسىندا قايتىس بولعان. كۋمار ماۋسىمدا اۋرۋحاناعا ەكى رەت تۇسكەن. كەيىن اكتەرگە ەكى جاقتى پليەۆرا ەففۋزياسى دياگنوزى قويىلىپ، ءتيىستى ەمدەۋ جۇرگىزىلگەن. الايدا ماۋسىمنىڭ سوڭىندا كۋمار تاعى دا تىنىس الۋى ناشارلاپ اۋرۋحاناعا تۇسكەن.
بولليۆۋدتىڭ اتاقتى اكتەرلارى، ساياساتكەرلەرى مەن جۇلدىزدارى اتى اڭىزعا اينالعان اكتەردى ەسكە الىپ، تۋىستارىنا كوڭىل ايتتى.
ديليپ كۋمار 1922 -جىلى 11-جەلتوقساندا پەشاۆار قالاسىندا دۇنيەگە كەلگەن. ول 1950-1970 -جىلدارى تانىمال بولدى. ەلۋ جىلدان اسا مانسابىندا اكتەر 59 فيلمگە ءتۇسىپ، تاعى 4 فيلمگە قوناق جۇلدىز رەتىندە شاقىرىلعان. اكتەردىڭ ارتىندا ايگىلى كينو اكتريساسى سايرا بانۋ قالدى. ولاردىڭ بالاسى بولماعان.
اكتەر ءۇندىستاننىڭ كينو سالاسىنداعى ەڭ جوعارى ماراپاتى داداساحەب فالكە سىيلىعىن يەمدەنگەن. ول 1954 -جىلى ەڭ جاقسى ەر ادام ءرولى ءۇشىن Filmfare سىيلىعىن العان العاشقى اكتەر جانە وسى ۋاقىتقا دەيىن شاحرۋح حانمەن بىرگە وسى نوميناتسيادا 8 ماراپات الىپ، رەكورد ورناتتى. سىنشىلار كۋماردى بولليۆۋد تاريحىندا اڭىزعا اينالعان اكتەر دەپ جاريالادى.
