ۇ ب ت مەن سىناما تەستىلەۋ بالىندا ناتيجە اۋىتقۋى جوعارى بولعاندار قاتاڭ تەكسەرىلەدى - ايماعامبەتوۆ
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«ۇلتتىق ءبىرىڭعاي تەستىلەۋ اياقتالدى. جالپى، 145 مىڭنان استام تالاپكەر قاتىسىپ، ولارعا 2 رەت تەست تاپسىرۋ مۇمكىندىگى بەرىلدى. مەنىڭ ويىمشا، بۇرىن-سوڭعى بولماعان، وتە قولايلى جاعداي جاسالدى دەپ ايتا الامىز. تيىمدىلىك جاعىنا كەلەر بولساق، بالالار ءۇشىن وتە ىڭعايلى فورمات بولدى. بۇعان قوسا، اكادەميالىق ادالدىق قاعيدالارىن ساقتاۋ ءۇشىن دە وتە ماڭىزدى قادامعا اينالدى. ەندى تامىز ايىنا دەيىن بەينەكامەرالار بويىنشا زەردەلەۋ جاسالىپ، ەگەر تاۋەكەلدەر بايقالاتىن بولسا، وندا ءتيىستى شەشىم قابىلداۋىمىز كەرەك. وتكەن جىلى دا مۇنداي جۇمىستى العاش رەت جۇرگىزگەن ەدىك. سوندا ءبىز بەكىتىلگەن تالاپتارعا سايكەس ءوزىن ۇستاماعانى، ەرەجەلەردى بۇزعانى ءۇشىن ءبىراز تالاپكەردىڭ ناتيجەسىن جويدىق. مىسالى، ناۋرىزدا سىناما تەستىلەۋ بولدى. سول سىناما تەستىلەۋ بالدارى مەن ۇ ب ت تەستىلەۋدىڭ بالدارىن سالىستىرىپ، 20 بالدان كوپ اۋىتقۋ بولسا، وندا ناتيجەلەرىندە وسىنداي اۋىتقۋ بار بارلىق بالانىڭ بەينەجازبالارىن بولەك قارايمىز. ۇلكەن زەرتتەۋ وتكىزەمىز»، - دەدى اسحات ايماعامبەتوۆ مينيسترلىكتىڭ اپپارات جينالىسىندا.
ونىڭ اتاپ وتۋىنشە، سىناما تەستىلەۋ مەن ۇ ب ت- دا 20 بالل اۋىتقۋ بولسا، وندا بۇل تاۋەكەلدىڭ بار ەكەندىگىن بىلدىرەدى.
«سوندىقتان ۇلتتىق ءبىرىڭعاي تەستىلەۋگە قاتىستى ءتيىستى شەشىم تامىز ايىندا شىعاتىن بولادى»، - دەدى مينيستر.
