ۇ ب ت- نىڭ ءادىل ءوتۋى قالاي باقىلاندى

نۇر-سۇلتان. قازاقپارات - ق ر ءبىلىم جانە عىلىم ۆيتسە-ءمينيسترى قۋانىش ەرعاليەۆ بيىل ۇلتتىق ءبىرىڭعاي تەستىلەۋدى ءادىل وتكىزۋ ءۇشىن قانداي شارالار قابىلدانعانىن اتادى، دەپ حابارلايدى قازاقپارات ءتىلشىسى.

«ۇلتتىق ءبىرىڭعاي تەستىلەۋ وتكىزۋ پۋنكتتەرىندە ءتيىستى ەرەجەلەردىڭ ساقتالۋىن باقىلاۋدى تەستىلەۋ اكىمشىلەرى جۇزەگە اسىردى. ولاردىڭ جالپى سانى 150 ادام بولدى. ۇيىمداستىرۋ ماسەلەلەرىن شەشۋ جانە ۇ ب ت- نى وتكىزۋدىڭ مونيتورينگىسىن جۇرگىزۋ ءۇشىن جەرگىلىكتى ءبىلىم بەرۋ ۇيىمدارىنىڭ باسشىلارى، قۇقىق قورعاۋ ورگاندارىنىڭ، قوعامدىق ۇيىمدار مەن ب ا ق وكىلدەرىنەن 648 ادامنان تۇراتىن وڭىرلىك مەملەكەتتىك كوميسسيالار قۇرىلدى. ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ 20 قىزمەتكەرى جانە ارناۋلى مونيتورينگ توپ پەن ادالدىق الاڭى قاتارىنان 14 باقىلاۋشى قاتىستى»، - دەدى ول مينيسترلىكتىڭ اپپارات جينالىسىندا.

ونىڭ اتاپ وتۋىنشە، تەستىلەۋ ءوتۋ بارىسىنا ۇلتتىق تەستىلەۋ ورتالىعىندا ورنالاسقان احۋالدىق ورتالىق ارقىلى ورتالىقتاندىرىلعان باقىلاۋ جۇرگىزىلدى.

«سونىمەن قاتار ءاربىر تەستىلەۋ وتكىزۋ پۋنكتىندە ونلاين كورسەتىلىم ۇيىمداستىرىلدى. اتالعان قىزمەت كورسەتۋلەر تەستىلەۋ كەزىندە ەرەجە بۇزۋشىلىقتاردىڭ سانىن ايتارلىقتاي ازايتۋعا مۇمكىندىك بەردى. ويتكەنى، ءاربىر ورىننىڭ ۇستىندە ورناتىلعان كامەرا ارقىلى باقىلاندى جانە تەستىلەۋدىڭ ءوتۋ بارىسىن باقىلاۋعا نيەت بىلدىرگەن ازامات قازاقستاننىڭ كەز كەلگەن جەرىنەن تەستىلەۋدى باقىلادى»، - دەدى قۋانىش ەرعاليەۆ.

اۆتور: مارلان جيەمباي