الماتىدا جول اپاتىنا كىنالى ماس جۇرگىزۋشى توبەلەس شىعاردى

الماتى. قازاقپارات - الماتىدا جول اپاتىنا كىنالى ماس جۇرگىزۋشى توبەلەس شىعاردى.

قالالىق پوليتسيا دەپارتامەنتى وقيعانىڭ ءمان-جايىن ءتۇسىندىردى، دەپ حابارلايدى قازاقپارات ءتىلشىسى. جۇرگىزۋشىلەردىڭ توبەلەسى الەۋمەتتىك جەلىدە تارادى. كادرلاردان بىرنەشە ەر ادامنىڭ جول اپاتىنان كەيىن سوزگە كەلىپ قالعانىن كورۋگە بولادى، ال كۋاگەرلەر ولاردى اراشالاپ ءجۇر. «الماتى- اراسان شاتقالىنداعى جول اپاتى. «Mersedes» جۇرگىزۋشىسى ماس كۇيدە جول جيەگىندە تۇرعان ەكى كولىكتى قاعىپ كەتتى. فۋتبولكاسىن شەشىپ تاستاعان ەر ادام توبەلەس شىعارماق بولدى»، - دەلىنگەن ۆيدەو سيپاتتاماسىندا.

الماتى پوليتسيا دەپارتامەنتىنىڭ مالىمەتىنشە، جول اپاتى 5-شىلدە كۇنى شامامەن كەشكى ساعات 17.00-دە بولعان.

«ا. ەسىمدى جۇرگىزۋشى جول قوزعالىسى ەرەجەلەرىن، 2.4.2-ءبولىمنىڭ تالاپتارىن بۇزا وتىرىپ، ماس كۇيدە «Mercedes» ماركالى كولىگىن باسقارىپ، كازاچكا كوشەسىمەن سولتۇستىك باعىتتا كەلە جاتىپ «Mercedes» اۆتوكولىگىمەن سوقتىعىستى، ودان ءارى «BMW» ماركالى كولىگىن قاقتى. جول-كولىك وقيعاسى سالدارىنان ەكى اۆتوموبيلگە دە زاقىم كەلدى. زارداپ شەككەندەر جوق. ماتەريالدى بوستاندىق اۋداندىق پوليتسيا باسقارماسىنىڭ قىزمەتكەرلەرى وندىرىسكە الدى»، - دەدى الماتى قالاسى پ د انىقتاۋ باسقارماسىنىڭ باسشىسى ولجاس ءشارىپوۆ.

اۆتور: الما مۇقانوۆا