«اداي» كۇيى سيرەك كەزدەسەتىن اسپاپپەن ورىندالدى
قۇرمانعازىنىڭ اتاقتى كۇيىن دومبىرامەن پاۆلودار مۋزىكالىق كوللەدجىنىڭ مۇعالىمى سالتانات وتەمىسوۆا جانە وبلىستىق فيلارمونيانىڭ قازاق ۇلتتىق اسپاپتارى وركەسترىنىڭ ءارتىسى مەيىرمان بايبوسىنوۆ ورىندادى.
ولاردى قازاقستاندا ەلەكتروۆيولونچەلدە ويناي الاتىن جالعىز مۋزىكانت - وبلىستىق فيلارمونيانىڭ سيمفونيالىق وركەسترىنىڭ ءارتىسى كسەنيا دەلياحمەتوعلۋ ءوزىنىڭ بالاماسى جوق اسپابىمەن سۇيەمەلدەدى.
- بۇل كليپتە «ادايدىڭ» ءداستۇرلى ۇنىنە ەلەكتروۆيولونچەل ارالاسىپ، كۇيگە ەرەكشە اۋەز بەرىپ تۇر، - دەيدى وبلىستىق فيلارمونيا ديرەكتورىنىڭ ورىنباسارى ءلاتيپا قۇراقبايەۆا.
- ونىڭ ماعىناسى - قازاقتىڭ ۇلتتىق اۋەزدەرىن كەز كەلگەن مۋزىكالىق اسپاپ ارقىلى ەڭ جوعارى دەڭگەيدە ورىنداۋعا بولاتىنىن دالەلدەۋ. وعان قوسا كليپتى كورسەڭىز، وندا دومبىرا مەن ەلەكتروۆيولونچەل، كىم مىقتى دەگەندەي، ءبىر-بىرىمەن جارىسا وينايدى.
بەينەبايان «ەرتىس مەديا» ج ش س تەحنيكالىق قولداۋىمەن پاۆلودارداعى 17-قاباتتىق تۇرعىن ءۇيدىڭ شاتىرىندا تۇسىرىلگەن. بەينەكليپتە سونداي-اق، پاۆلودار مەن باياناۋىلدىڭ سۇلۋ جەرلەرى كورسەتىلگەن.
