قوستانايدا «ءماجبۇرلى ۆاكسينالاۋعا قارسى» ميتينگىگە شاقىرعان ەر ادامعا ۇكىم شىقتى
الايدا ەر ادامنىڭ ءوزى تەلەفونىندا مەسسەندجەر ورناتىلماعانىن جانە اكىمدىككە باسقا ماسەلە بويىنشا ميتينگ تۋرالى حابارلاما بەرگەنىن ايتتى، - دەپ حابارلايدى «نوۆايا گازەتا» باسىلىمى.
قوستانايدىڭ مامانداندىرىلعان اكىمشىلىك سوتى 5-شىلدەدە سەرگەي زينچەنكونى ا ق ب ت ك- نىڭ 488-بابى 7-بولىگى «بەيبىت جينالىستى ۇيىمداستىرۋ جانە وتكىزۋ ءتارتىبى تۋرالى زاڭنامانى بۇزۋ» بويىنشا اكىمشىلىك جاۋاپقا تارتۋ تۋرالى شەشىم شىعاردى. كىنالى ءۇش تاۋلىككە قاماۋعا الىندى.
پوليتسيا جاساعان اكتىگە سايكەس، زينچەنكو 3-شىلدەدە ەكى Telegram ارنادا 6-شىلدەدە ميتينگىگە شىعۋ تۋرالى حابارلاما جاريالاعان. بۇل رەتتە باستاپقىدا «وبلىستىق بالالار اۋرۋحاناسىندا م ر ت جانە ك ت اپپاراتتارىن ورناتۋ» بويىنشا بەيبىت جينالىس وتكىزۋگە ءوتىنىم بەرىلگەن، ءبىراق قوستاناي اكىمدىگى سانيتارلىق شارالارعا بايلانىستى رۇقسات بەرمەگەن. قازاقستاننىڭ باس سانيتاريا دارىگەرىنىڭ جاڭا قاۋلىسى شىققاننان كەيىن ميتينگ تاقىرىبى «ءماجبۇرلى ۆاكسيناتسياعا قارسى» دەپ وزگەردى.
«سوت وتىرىسىندا زينچەنكو كىناسىن مويىندامادى. ول Telegram-عا سۋرەتتەردى سالماعانىن ايتتى، ويتكەنى مۇنداي قوسىمشاسى جوق. Instagram مەسسەندجەرىندە اككاۋنتى بار، وندا ول تۋرالى دەرەكتەر كورسەتىلگەن، سۋرەتى بار. 16-ماۋسىمدا ول جەرگىلىكتى اتقارۋشى ورگانعا بەيبىت جينالىس وتكىزۋگە ءوتىنىش جازعان، ميتينگ ماقساتى - وبلىستىق بالالار اۋرۋحاناسىن مەديتسينالىق جابدىقپەن جاراقتاندىرۋدى، ەپيلەپسياسى بار بالالاردى ءدارى- دارمەكتەرمەن قامتاماسىز ەتۋدى تالاپ ەتۋ. وعان جاۋاپ ءۇش تاۋلىكتەن كەيىن كەلدى»، - دەدى سۋديا اسەمگۇل امىرعاليەۆا.
زينچەنكو بۇعان دەيىن اكىمدىكتىڭ جاۋابى ءوتىنىش بەرىلگەننەن كەيىن ءتورتىنشى كۇنى كەلگەنىن حابارلاعان، ءبىراق ول بۇل قۇجاتتى قابىلداۋدان باس تارتتى، ويتكەنى ول 3 كۇندە حات كەلمەسە، ميتينگ وتكىزۋگە بولادى دەپ سانايدى.
سۋديا امىرعاليەۆا زينچەنكونىڭ Telegram-دا ميتينگىگە شاقىرماعانى تۋرالى دالەلدەرىن جوققا شىعاردى، سەبەبى جاريالانعان ۆيدەولار زينچەنكوعا تيەسىلى @Kst10123 قولدانۋشىنىڭ اتىنان جىبەرىلگەن، ال ول ەر ادامنىڭ نومىرىنە تىركەلگەن.
«سوت ايتىلعان دالەلدەرگە سۇيەنە وتىرىپ، زينچەنكونىڭ بارلىق دالەلىن اكىمشىلىك جاۋاپكەرشىلىكتەن جالتارۋ دەپ باعالادى، ال ونىڭ قۇقىق بۇزۋشىلىق ءۇشىن كىنالى ەكەنىن دالەلدەندى دەپ سانايدى»، - دەپ شەشتى سۋديا.
