قازاق ەستراداسىنىڭ جۇلدىزدارى ەسىل ۇستىندەگى پاروحودتا ونەر كورسەتتى - فوتو

نۇر-سۇلتان. قازاقپارات - نۇر-سۇلتان قالاسىندا 5-7-شىلدەدە ەلوردا كۇنىنە جانە قازاقستان تاۋەلسىزدىگىنىڭ 30 جىلدىعىنا وراي «ەسىل تولقىنى» اتتى مەرەكەلىك جىلجىمالى كونسەرت ءوتىپ جاتىر، دەپ حابارلايدى قازاقپارات ءتىلشىسى.

ۇيىمداستىرۋشىلاردىڭ مالىمەتىنشە، ءىس-شارا ماقساتى - نۇر-سۇلتان قالاسىنىڭ تۇرعىندارى مەن قوناقتارىن ەلوردا كۇنىمەن قۇتتىقتاۋ، مەرەكەلىك كوڭىل-كۇي سىيلاۋ.

«ەسىل تولقىنى» كونسەرتىنە قاتىسۋشىلار ەسىل بويىمەن سەرۋەن قۇراتىن پاروحودتا ونەر كورسەتۋدە.

«كارانتيندىك شەكتەۋلەرگە بايلانىستى جانە ازاماتتار پاندەميا جاعدايىندا ءبىر جەردە جينالماس ءۇشىن ءىس- شارا ەسىل وزەنى بويىمەن پاروحودتا وتۋدە. ارتىستەر، شىعارماشىلىق ۇجىمدار «استانا» اتالاتىن پاروحودتا ونەر كورسەتۋدە. كونسەرت باعدارلاماسى 3 ساعاتقا ەسەپتەلگەن. ءىس- شارانىڭ بارلىق قاتىسۋشىسى كوروناۆيرۋسقا قارسى ۆاكسينا العان. دەنساۋلىق جاعدايىنا بايلانىستى ەگىلمەگەندەر پ ت ر- تەستىدەن ءوتتى»، - دەدى كونسەرت ۇيىمداستىرۋشىلارى.

قالا اكىمدىگىنىڭ قولداۋىمەن ۇيىمداستىرىلعان كونسەرت باعدارلاماسىنا ەسترادالىق جانە قازاق حالقىنىڭ اندەرى ەنگەن. شاراعا قانات جانە سۆەتا ايتبايەۆتار، مايرا يلياسوۆا، ارايلىم راحيم، پاراسات وتان، التىناي جورابايەۆا، اسەم وماروۆا، دوس، ديانا مايەۆا، مارجان اراپبايەۆا جانە باسقا دا ورىنداۋشىلار قاتىستى.

ايتا كەتەيىك، 7-شىلدەدە قورىتىندى گالا-كونسەرت وتەدى.

اۆتور: ميرا تولەندى قىزى