قارجى پيراميداسىن جارنامالاعان «جۇلدىزدار» نەگە جازالانبايدى

نۇر-سۇلتان. قازاقپارات - باس پروكۋرور عيزات نۇرداۋلەتوۆ ءماجىلىس دەپۋتاتتارىنا قارجى پيراميدالارىن جارنامالاعان تانىمال ادامدار نەگە جاۋاپقا تارتىلمايتىنىن ءتۇسىندىردى، دەپ حابارلايدى قازاقپارات.

«شىنىندا دا، قارجى پيراميداسىن ۇيىمداستىرۋشىلار ءوز قىزمەتىن جارنامالاۋ ءۇشىن اتاقتى ادامداردى تارتقان. فورمالدى تۇردە ولاردىڭ ارەكەتتەرىندە اكىمشىلىك قۇقىق بۇزۋ تۋرالى كودەكستىڭ 150-بابى (قارجىلىق (ينۆەستيتسيالىق) پيراميدا قىزمەتىن جارنامالاۋ) قۇقىق بۇزۋشىلىقتىڭ قۇرامى بايقالادى. الايدا قىلمىستىق ءىس بويىنشا ۇكىم شىققانعا دەيىن ۇيىمنىڭ قارجى پيراميداسى بولىپ تابىلاتىنىن نەمەسە تابىلمايتىنىن انىقتاۋ مۇمكىن ەمەس. وسىعان بايلانىستى، جارنامالاۋ كەزىندە جوعارىدا اتالعان ۇيىمدار قارجى پيراميدالارى بولىپ تانىلماعان. سوندىقتان اكىمشىلىك قۇقىق بۇزۋ تۋرالى كودەكستىڭ 150-بابى بويىنشا مەديالىق تۇلعالاردى اكىمشىلىك جاۋاپكەرشىلىككە تارتۋ ءۇشىن قۇقىقتىق نەگىز جوق»، - دەپ جازىلعان دەپۋتاتتىق ساۋالعا جولدانعان جاۋاپتا.

عيزات نۇرداۋلەتوۆ دەپۋتاتتارعا بەرگەن جاۋابىندا الماتى قالاسىندا تىركەلگەن وسى سيپاتتاعى وقيعانىڭ قازىر قالاي ءوربىپ جاتقانىن دا بايانداعان. «بيىلعى ءساۋىر- مامىر ايلارىندا الماتى قالاسىنىڭ پوليتسيا دەپارتامەنتىنە قارجى پيراميداسىن قۇرۋ جانە باسقارۋ («Astex.kz» ج ش س، «ACD technology» ج ش س جانە «مۋدارابا» ج ش س) فاكتىسى بويىنشا ك. ەسىمدى ازاماتقا قاتىستى شارالار قابىلداۋ تۋرالى ارىزدار كەلىپ تۇسكەن. قىلمىستىق كودەكستىڭ 217-بابى 3-بولىگىنىڭ 2-تارماعى بويىنشا سوتقا دەيىنگى تەرگەۋ باستالدى. جوعارىدا اتالعان ادام ۇستالىپ، ۋاقىتشا ۇستاۋ يزولياتورىنا قامالدى. تەرگەۋ جالعاسۋدا»، - دەلىنگەن جاۋاپتا

اۆتور: ەسىمجان ناقتىباي