دومبىرا كۇنى: قانداي مادەني شارالار وتەدى؟
كونسەرت QAZAQSTAN تەلەارناسىنان تىكەلەي ەفيردە كورسەتىلەدى. كونسەرتتە قۇرمانعازى اتىنداعى قازاق اكادەميالىق حالىق اسپاپتار وركەسترى، ن. تىلەندييەۆ اتىنداعى «وتىرار سازى» ەتنوفولكلورلىق وركەسترى، تاتتىمبەت اتىنداعى اكادەميالىق فيلارمونياسىنىڭ حالىق اسپاپتارىنان قۇرالعان جيىنتىق وركەستر مەن ەلىمىزدىڭ ءداستۇرلى ونەرپازدارى ساحناعا شىعادى.
ۇلتتىق دومبىرا كۇنىندە رەسپۋبليكامىزدىڭ 17 وڭىرىنەن كەلگەن تاۋەلسىزدىك قۇرداستارىنان قۇرالعان 30 دومبىراشى تاۋەلسىزدىكتىڭ مەرەيلى 30 جىلدىعىنا كۇيدەن شاشۋ شاشادى.
قالا تۇرعىندارى مەن قوناقتارىنا العاشقى رەت دومبىرا كۇنىنە ارنايى سىيلىق رەتىندە ەكسپو ورتالىعى الاڭىندا كۇي مەكتەپتەرىنىڭ كورنەكتى تۇلعالارىنىڭ كۇيلەرىن ۇيالى تەلەفونمەن QR- كود ارقىلى جۇكتەپ الىپ تىڭداۋعا بولاتىن اقپاراتتىق ستەندتەر ورناتىلادى.
ەكسپو ورتالىعى الاڭىندا اسپان استىنداعى ساحنادا قازاقستاننىڭ ەڭبەك سىڭىرگەن ارتيستەرى سەكەن تۇرىسبەكوۆ، ايگۇل ۇلكەنبايەۆا، قازاقستاننىڭ ەڭبەك سىڭىرگەن قايراتكەرلەرى باتىرجان مىقتىبايەۆ، نۇركەن ءاشىروۆ سىندى داۋلەسكەر كۇيشىلەرىمىز اتاقتى كۇيشى بابالارىمىز قۇرمانعازى، قازانعاپتان باستاپ قازاقستان كومپوزيتورلارىنىڭ كۇمبىرلەگەن كۇيىنەن شاشۋ شاشىپ، قازاقستاننىڭ ەڭبەك سىڭىرگەن ءارتيسى رامازان ستامعازيەۆ، قازاقستاننىڭ ەڭبەك سىڭىرگەن قايراتكەرلەرى ساۋلە جانپەيىسوۆا، ەلمۇرا جاڭابەرگەن، ارداق بالاجانوۆا، ەرلان رىسقالي سىندى كۇمىس كومەي انشىلەرىمىز اۋەلەتە ءان شىرقايدى.
«ناعىز قازاق قازاق ەمەس، ناعىز قازاق دومبىرا» اتتى ءان مەن كۇي توگىلگەن كونسەرتىمىزدە جاس ورىنداۋشىلار - حالىقارالىق جانە رەسپۋبليكالىق كونكۋرستاردىڭ لاۋرەاتتارى ونەر كورسەتەدى. سونىمەن قاتار كونسەرت اياسىندا وڭىرلەردەن كەلگەن تانىمال دومبىرا شەبەرلەرىنە مادەنيەت جانە سپورت مينيسترلىگى اتىنان العىس حات پەن مەرەكەلىك كادەسىي تابىس ەتىلەدى.
ەسكە سالساق، بۇگىن قازاقستانىقتار ۇلتتىق دومبىرا كۇنىن اتاپ وتۋدە. 2018-جىلدان بەرى شىلدەنىڭ العاشقى جەكسەنبىسى قازاقتىڭ ءتول اسپبىنىڭ كۇنى رەتىنە تويلانىپ كەلەدى.
