اتىراۋدا تۇرعىن ۇيدە گاز جارىلىپ، ءبىر ادام مەرت بولدى

اتىراۋ. قازاقپارات - اتىراۋدا تۇرعىن ۇيدە گاز جارىلىپ، ءبىر ادام مەرت بولدى. ال، جاس ءوسپىرىم جانساقتاۋ بولىمىنە ءتۇستى، دەپ حابارلايدى قازاقپارات.

وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، كەشە، 2- شىلدە ساعات 19:30-دا اتىراۋ قالاسىنىڭ ىرگەسىندە تاسقالا ەلدىمەكەنىندە تۇرعىن ءۇي ورتەنگەن.

«وقيعا ورنىنا جەدەل جەتكەن ءورت سوندىرۋشىلەر جەكە تۇرعىن ءۇيدىڭ اس دايىنداۋ بولمەسىندە گاز-اۋا قوسپاسىنىڭ جينالۋىنان ءورت شىققانىن انىقتادى. ءورت ساعات 20:00 كەزىندە ءسوندىرىلدى. جالىندى سوندىرۋگە توتەنشە جاعدايلار دەپارتامەنتىنىڭ جەكە قۇرامىنان 12 قىزمەتكەر مەن 3 تەحنيكا جۇمىلدىرىلدى» دەپ ءمالىم ەتتى دەپارتامەنتتىڭ باسپا ءسوز قىزمەتىنەن.

بەلگىلى بولعانداي، ءورت سالدارىنان وقيعا ورنىندا 1972-جىلى تۋعان ايەل مەرت بولعان. ال، 2009-جىلى تۋعان جاس ءوسپىرىم %85 تەرميالىق كۇيىكپەن وبلىستىق بالالار اۋرۋحاناسىنا جەتكىزىلگەن.

قازىر وتە اۋىر جاعدايدا جانساقتاۋ بولىمىندە جاتىر.

«ءورتتىڭ شىعۋ سەبەبى - گاز جابدىعىن پايدالانۋ كەزىندە قاۋىپسىزدىك شارالارىنىڭ بۇزىلۋى. وتباسىنىڭ باسقا مۇشەلەرىنىڭ ايتۋىنشا، وزدەرى گاز پليتاسىن گاز جەلىسىنە ارنايى مامانداردىڭ قاتىسۋىنسىز جالعاعان. بۇل - گاز جانە جىلىتۋ قۇرىلعىلارىن پايدالانۋ ەرەجەلەرىن ورەسكەل بۇزۋ» دەپ حابارلادى دەپارتامەنتتىڭ باسپا ءسوز قىزمەتى.

ەسكە سالا كەتەلىك، بۇدان بۇرىن اتىراۋدا يەسى بولماعان كەزدە كوپقاباتتى تۇرعىن ۇيدەگى پاتەر ورتەنگەن بولاتىن.