قۇمار اقساقالوۆ: كارتوپ باعاسىن ۋىستا ۇستاۋ ءۇشىن ەكسپورتتى رەتتەۋ كەرەك

نۇر-سۇلتان. قازاقپارات - سولتۇستىك قازاقستان وبلىسىنىڭ اكىمى قۇمار اقساقالوۆ ورتالىق كوممۋنيكاتسيالار قىزمەتىنە وتكەن باسپا ءسوز كونفەرەنسياسىندا ەگىندى وڭىردە كارتوپ باعاسىنىڭ قىمباتتاۋ سەبەپتەرىن ءتۇسىندىردى، دەپ حابارلايدى قازاقپارات.

«بۇل ماسەلەنى تەك ەكسپورتتى رەتتەۋ ارقىلى شەشۋگە بولادى. ويتكەنى ەكونوميكا اشىق. ۇكىمەتپەن جانە باسقا دا اكىمدىكتەرمەن بىرلەسىپ، كوكونىستەردىڭ قاجەتتى كولەمىن ەسەپتەپ، بارلىعىن ەكسپورتقا شىعارماي، ەلدە قاجەتتى كولەمدى قالدىرۋ كەرەك. كوكونىس باعاسى كوتەرىلگەنى راس. كۇزدەن باستاپ باعالار كۇرت كوتەرىلە باستادى. سوندىقتان شارۋا قوجالىقتار كوپتەگەن تاۋارلاردى بەلسەندى ەكسپورتتادى. مىسالى، كۇزدە كارتوپتى 95 تەڭگە كوتەرمە باعامەن ساتقان فاكتىلەر بار»، - دەدى اكىم.

س ق و اكىمى وبلىستا تۇراقتاندىرۋ قورى بار ەكەنىن ەسكە سالدى.

«تۇراقتاندىرۋ قورى بىزدە دە بار. ءبىز كەم دەگەندە وسى قويماعا 800 توننا كارتوپ ساتىپ الامىز، بولاشاقتا ولاردى 26 دۇكەندە تومەن باعامەن ساتامىز. قىس بويى ءبىزدىڭ كارتوپتى 100 نەمەسە 110 تەڭگەگە ساتتى»، - دەدى ايماق باسشىسى.

قۇمار اقساقالوۆ جىل سايىن مامىر ايىنا وڭتۇستىك وبلىستاردان كارتوپتىڭ جاڭا پارتياسى كەلەتىنىن، ءبىراق ونى ماۋسىمعا دەيىن ساقتاۋ قيىن ەكەنىن اتاپ ءوتتى.

«ەكولوگيالىق تازا ءونىم بولعاندىقتان، كارتوپتى ۇزاق ساقتاۋ ءۇشىن ءتۇرلى جاڭا تەحنولوگيالاردى قولدانساق تا، بۇزىلىپ كەتەدى. بيىل مامىر ايىنىڭ ورتاسىندا كارتوپ بولماي، سالدارىنان 2-3 اپتا بويى باعا جوعارى بولىپ تۇردى. ايتپەسە ءوزىمىزدى %100 كارتوپ پەن كوكونىسپەن قامتاماسىز ەتە الامىز»، - دەدى وبلىس اكىمى.