تۇركىستاندا نۇرسۇلتان نازاربايەۆتىڭ تاعى ءبىر ەسكەرتكىشى بوي كوتەردى
ەڭسەلى ەسكەرتكىشتىڭ بيىكتىگى - 4 مەتر، تۇتاستاي قولادان قۇيىلعان ءمۇسىننىڭ اۆتورى - قازاقستاننىڭ ەڭبەك سىڭىرگەن قايتارتكەرى، ق ر سۋرەتشىلەر وداعىنىڭ مۇشەسى تىلەۋبەردى بيناش.
ەسكەرتكىش ق ر تۇڭعىش پرەزيدەنتى - ەلباسى ن. نازاربايەۆتىڭ ەگىس القابىندا تۇسكەن فوتوسۋرەتىنە قاراپ جاسالعان.
تۇركىستانداعى جاڭا اكىمشىلىك-ىسكەرلىك ورتالىعىندا ورناتىلعان ءمۇسىننىڭ كومپوزيتسياسىندا «ۇلى دالانىڭ ۇلى» اتتى ەلباسى ەسكەرتكىشىندە قارت قاراتاۋدىڭ سۇلباسى بەينەلەنگەن.
اۆتور ەلباسىنىڭ قاراتاۋ جازىعىندا شەكسىز دالاعا بايىپپەن قاراعان ءساتىن سۋرەتتەگەن.
ەلباسى نۇرسۇلتان ءابىش ۇلى نازاربايەۆقا ەسكەرتكىش قويۋ تۋرالى باستامانى كاسىپكەر بولاتبەك اليەۆ كوتەرىپ، اتالعان يدەياعا تۇركىستاندىق ارداگەر- اقساقالدار، زيالى قاۋىم وكىلدەرى، ءماسليحات دەپۋتاتتارى مەن كاسىپكەرلەر، قوعامدىق ۇيىم وكىلدەرى قولداۋ بىلدىرگەن بولاتىن.
وبلىس اكىمىنە ۇندەۋ جازعان تۇرعىنداردىڭ ءوتىنىش-تىلەكتەرى ورتالىق مەملەكەتتىك ورگاندار كەلىسىمىمەن جۇزەگە استى.
بۇدان بولەك، تۇركىستان قالاسىنىڭ اكىمدىگى تاراپىنان اتالعان باستاماعا قاتىستى جەرگىلىكتى تۇرعىندار اراسىندا ساۋالناما جۇرگىزىلدى.
ساۋالناماعا 1000 رەسپوندەنت قاتىسىپ، ولاردىڭ %93 باستامانى قولدايتىندارىن بىلدىرگەن بولسا، رەسپوندەنتتەردىڭ %4,5 قارسى، %2,5 بەيتاراپ پوزيتسيانى ۇستانعان. دەمەۋشىنىڭ قارجىسىنا ورناتىلعان ەڭسەلى ەسكەرتكىشتىڭ سالتاناتتى اشىلۋىنا قازاقستان حالىق ءارتىسى، مەملەكەت جانە قوعام قايراتكەرى ءاسانالى ءاشىموۆ، «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ءتوراعاسى ءومىرزاق وزعانبايەۆ، قازاقستان ۇلتتىق عىلىم اكادەمياسىنىڭ پرەزيدەنتى، اكادەميك، حيميا عىلىمدارىنىڭ دوكتورى، پروفەسسور مۇرات جۇرىنوۆ، قازاقستان رەسپۋبليكاسى مەملەكەتتىك ەلتاڭباسىنىڭ اۆتورى جانداربەك مالىبەكوۆ، جازۋشى، حالىقارالىق «الاش» ادەبي سىيلىعىنىڭ لاۋرەاتى مارحابات بايعۇت، قالامگەر، حالىقارالىق «الاش» ادەبي سىيلىعىنىڭ لاۋرەاتى، قوعام قايراتكەرى كوپەن امىربەك، قازاقستان رەسپۋبليكاسىنىڭ پارلامەنتى ءماجىلىسىنىڭ دەپۋتاتى دارحان مىڭباي، تۇركىستان وبلىسى «ارداگەرلەر ۇيىمى» قوعامدىق بىرلەستىگىنىڭ ءتوراعاسى جەڭىسبەك ماۋلەنقۇلوۆ قاتىستى.
شارادا ءسوز العان «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ءتوراعاسى ءومىرزاق وزعانبايەۆ وسىنداي ەلەۋلى ءساتتىڭ كۋاسى بولعانىنا قۋانىشتى ەكەنىن جەتكىزدى.
«تۇركىستان ءوڭىرىنىڭ حالقىنىڭ وتىنىشىمەن، كاسىپكەرلەردىڭ باستاماسىمەن كونە شاھارعا جاڭا لەپ اكەلگەن، تۇركى ينتەگراتسياسىنىڭ ىسكە اسىرۋ يدەياسىنا مۇرىندىق بولعان، تۇركىستانعا تاريحي مارتەبەسىن قايتارعان ەلباسىنىڭ ەرەن ەڭبەگىن جوعارى باعالاي وتىرىپ، وبلىس ورتالىعى تۇركىستاندا نۇرسۇلتان ءابىش ۇلى نازاربايەۆتىڭ ەسكەرتكىشى اشىلدى. بۇل - تاۋەلسىز ەلدىڭ شەكاراسىن شەگەندەپ، قازاق ەلىندە تىنىشتىق پەن بەرەكەنى نەگىز ەتكەن ەلباسىنا العىس رەتىندە جانە تۇركى ەلدەرىنىڭ باسىن قوسۋعا مۇددەلى بولعان تۇركى الەمىنىڭ دانا اقساقالىنا دەگەن ەرەكشە قۇرمەت»، - دەدى قوعام قايراتكەرى.
