سپورتتىڭ قاي ءتۇرى جۇرەككە كوبىرەك پايدالى؟

نۇر-سۇلتان. قازاقپارات - ادام دەنساۋلىعى ءۇشىن سپورتتىڭ ماڭىزى زور. اركىم وزىنشە سپورتپەن اينالىسىپ، كوڭىل قالاۋىن ورىنداعىسى كەلەدى. ءبىراق سپورتقا كوڭىل بولەردە دەنە مۇشەسىنە زيانى تيمەيتىنىن تاڭداۋ وتە ماڭىزدى.

اسىرەسە جۇرەك جۇمىسى سپورت تاڭدايدى. سونىمەن جۇرەككە اۋىرلىق تۇسىرمەي، پايداسىن ارتتىرۋ ءۇشىن سپورتتىڭ قاي تۇرىمەن اينالىسقان دۇرىسىراق؟

بۇل ساۋالدىڭ جاۋابىن ا. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ كارديولوگ دارىگەرى راشيدا حاليمنازاروۆادان سۇراپ كوردىك.

دارىگەردىڭ ايتۋىنشا، سپورتتىڭ قاي ءتۇرىن تاڭداساق تا جۇرەككە پايدالى. ءبىراق دەنساۋلىققا قاراعان ابزالىراق.

«ەگەر ادامنىڭ دەنساۋلىعى جاقسى، جۇرەك جۇمىسى قالىپتى بولسا، كەز كەلگەن سپورتپەن اينالىسۋعا بولادى. ءبىراق جۇرەككە اۋىر كۇش تۇسپەگەنى دۇرىس. قالىپتى جاتتىعۋ قان اينالىمىن جاقسارتىپ، جۇرەك جۇمىسىنىڭ وڭالۋىنا مۇمكىندىك بەرەدى. ال جۇرەگى اۋىراتىن جاندارعا ەمدەلۋشى دارىگەرمەن اقىلداسىپ بارىپ، سپورتتى تاڭداعان ابزال»، - دەيدى راشيدا حاليمنازاروۆا.

ال «قاي سپورت جۇرەككە زيان؟» دەگەن ساۋالىمىزعا دارىگەر كروسسفيت، اۋىر اتلەتيكا، پاۋەرليفتينگ سىندى اگرەسسيالىق سپورت تۇرلەرى جۇرەككە اسا زيان دەپ جاۋاپ بەردى.

«ەگەر جۇرەككە اۋىر كۇش پەن جۇك تۇسسە، گيپەرتروفياعا ۇشىراۋى مۇمكىن. ياعني، جۇرەكتىڭ قابىرعاسى كەڭەيىپ كەتەدى دە، قان تامىرى يىلگىش قاسيەتى مەن جۇمساق يكەمىنەن ايىرىلادى. سوندىقتان اۋىر سپورتپەن اينالىساتىن كاسىبي سپورتشىلاردىڭ كوبى ەرتە قايتىس بولادى»، - دەپ ءتۇسىندىردى كارديولوگ.

ال سپورتپەن اينالىسپايتىن، تەك دەنە جاتتىعۋىن جاساۋدى قۇپ كورەتىن جاندارعا دارىگەر مىناداي كەڭەس بەردى.

«سپورتپەن اينالىسپاعاندارعا جاياۋ جۇرگەن پايدالى. ادام كۇنىنە كەم دەگەندە 10 مىڭ قادام باسىپ نەمەسە 10 شاقىرىم ءجۇرۋى ءتيىس. تاڭعى جاتتىعۋ دا جۇرەككە جاقسى سەرپىن مەن كۇش بەرەدى»، - دەيدى مامان.

massaget.kz