تاشكەنتتە كوروناۆيرۋس ءورشىپ، ناۋقاستار اۋرۋحاناعا سىيماي قالدى

تاشكەنت. قازاقپارات - كوروناۆيرۋس ينفەكسياسىن جۇقتىرعان ناۋقاستار كوبەيىپ، سالدارىنان تاشكەنت اۋرۋحانالارىندا ورىن جەتىسپەۋدە، دەپ حابارلايدى قازاقپاراتتىڭ مەنشىكتى ءتىلشىسى.

بۇل تۋرالى «وزبەكستان 24» تەلەارناسىنا ءبىرىنشى زەڭگىاتا كوپبەيىندى اۋرۋحاناسى ديرەكتورىنىڭ ورىنباسارى وليمجون يسحاكوۆ ايتتى.

«ءبىزدىڭ اۋرۋحانا 2 مىڭ ادامعا ارنالعان. ءبىراق قازىر مۇندا 2550 ناۋقاس ەم الۋدا. كوروناۆيرۋس جۇقتىرعانداردىڭ سانى كۇرت كوبەيدى، اسىرەسە اياعى اۋىر ايەلدەر مەن بالالار اراسىندا. بلوكتارداعى ناۋقاستاردىڭ كوپتىگىنەن ءبىز بالالاردى ەرەسەكتەرگە ارنالعان پالاتالارعا جاتقىزۋعا ءماجبۇرمىز. بۇل جاعداي ۆاكسينالاۋسىز ماسەلەنى شەشۋگە بولمايتىنىن كورسەتىپ وتىر»، - دەدى دارىگەر.

ونىڭ ايتۋىنشا، كۇندەلىكتى اۋرۋحاناعا شامامەن 350 ادام تۇسۋدە. بوس توسەك ورىن قالماعاندىقتان، ناۋقاستاردى قابىلداۋ توقتاتىلدى.

وسىنداي جاعداي ەكىنشى زەڭگىاتا كوپبەيىندى اۋرۋحاناسىندا دا بايقالادى، قازىرگى كەزدە ونداعى 2 مىڭ توسەك ورىننىڭ تەك 300 ى عانا بوس. ينفەكسيانىڭ تەز تارالىپ جاتقانىن ەسكەرسەك، ول دا ءبىر-ەكى كۇندە تولماق.

ەسكە سالا كەتەيىك، وزبەكستاندا ەپيدەميولوگيالىق احۋالدىڭ ورشۋىنەن 28-ماۋسىمنان باستاپ كارانتين كۇشەيتىلدى.

وزبەكستان استاناسى ەكى اپتالىق كارانتينگە جابىلدى. تاشكەنتتە ناۋقاستاردى جاتقىزاتىن توسەك- ورىندى كوبەيتۋ ءۇشىن 2 مىڭ ورىندىق كوۆيد ورتالىقتارى اشىلىپ جاتىر.

اۆتور: زارينا تۋعانبايەۆا