نۇر-سۇلتاندا بايگە تۇرلەرىنەن ەلباسى كۋبوگى تۋرنيرى وتەدى
بۇل تۋرالى بۇگىن ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان ايتتى، دەپ حابارلايدى قازاقپارات ءتىلشىسى.
«قازىرگى ۋاقىتتا ەلوردانىڭ «قازانات» اتشابارىندا ەپيدەميولوگيالىق تالاپتاردىڭ بارلىعىن ساقتاي وتىرىپ، سپورتتىق ءىس-شارالارىمىزدى جۇرگىزىپ جاتىرمىز. ق ر مادەنيەت جانە سپورت مينيسترلىگى، نۇر- سۇلتان قالالىق اكىمدىگى جانە ۇلتتىق سپورت قاۋىمداستىعىنىڭ ۇيىمداستىرۋىمەن 26 ماۋسىم مەن 5 شىلدە ارالىعىندا قر تاۋەلسىزدىگىنىڭ 30 جىلدىعىنا ارنالعان قازاقستان كوكپار فەدەراتسياسىنىڭ كۋبوگى رەسپۋبليكالىق ءتۋرنيرى ءوتىپ جاتىر. كوكپار فەدەراتسياسىنىڭ كۋبوگى كلۋبتار اراسىندا العاش رەت ۇيىمداستىرىلۋدا. جۇلدە قورى 12 ميلليون تەڭگەنى قۇرايدى. تۋرنير الداعى ۋاقىتتا دا جالعاسىن تابادى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
سونىمەن قاتار بەكبولات تىلەۋحان بۇگىن جانە ەرتەڭ «ونەر كوكپارى» رەسپۋبليكالىق تۋرنيرى وتەتىندىگىن، وعان 13 كوماندا قاتىسىپ جاتقانىن ايتتى.
«ال 5-شىلدەدە بايگە تۇرلەرىنەن ەلباسى كۋبوگى رەسپۋبليكالىق تۋرنيرى وتەتىن بولادى. جارىسقا ەلىمىزدىڭ بارلىق وڭىرلەرىنەن سپورتشىلار، 100-دەن استام سايگۇلىك قاتىساتىندىعى جوسپارلانعان. بايگە باعدارلاماسىنا العاش رەت قازاقتىڭ قازاناتى سانالاتىن قوستاناي تۇقىمدى جىلقىلاردىڭ جارىسى وتەيىن دەپ وتىر. جالپى 9 شاقىرىمدىق قۇنان بايگە، 16 شاقىرىمدىق كىشى الامان، 25 شاقىرىمدىق الامان، 23 شاقىرىمدىق قوستاناي تۇقىمدى جىلقىلار بايگەسى بولادى. جالپى بايگەنىڭ جۇلدە قورى 21 ميلليون تەڭگەنى قۇرايدى»، - دەدى ۇلتتىق سپورت تۇرلەرى قاۋىمداستىعىنىڭ پرەزيدەنتى.
