الماتىدان الاكولگە قانشا بيلەت قالدى - «جولاۋشىلار تاسىمالى» جاۋاپ بەردى
الاكولگە دەمالىعىسى كەلەتىندەر شومىلۋ ماۋسىمىندا پويىزعا بيلەت تابا الماي اۋرەگە تۇسەدى. «جولاۋشىلار تاسىمالى» ا ق باس ديرەكتورىنىڭ ماركەتينگ جانە ساتۋ جونىندەگى ورىنباسارى ۆيكتور بوكماننىڭ ايتۋىنشا، ماۋسىمدا تاۋلىگىنە ورتا ەسەپپەن 3700 بيلەت ساتىپ الىنادى. اسىرەسە، الاكولگە بيلەتتەرگە تاپشىلىق پەن ۇلكەن سۇرانىس الماتىدا بايقالادى. تاسىمالداۋشىنىڭ باسپا ءسوز قىزمەتىندەگىلەر بيلەت سانىنا قاتىستى دەرەكتەر كۇن سايىن كەلەسى 45 كۇنگە جاڭارتىلاتىنىن اتاپ ءوتتى.
«30-ماۋسىمدا ساعات 7.00-دەگى جاعداي بويىنشا 13-تامىزعا دەيىن الماتىدان الاكولگە دەيىن 8554 بيلەت ساتىلادى. ونىڭ ىشىندە 1417 كۋپە ۆاگوندارىندا جانە 7137 پلاتسكارت ۆاگوندارىندا. الداعى 10 كۇندە ساتىلىمدا 942 بيلەت بار»، - دەدى «جولاۋشىلار تاسىمالى» ا ق ساتۋ جانە كليەنتتەرمەن جۇمىس جۇرگىزۋ دەپارتامەنتىنىڭ ديرەكتورى ەرلان جيمايلوۆ.
ايتا كەتەيىك، رەداكسيانىڭ الماتىدان الاكولگە دەيىن قانشا بيلەتتى زاڭدى تۇلعالار ساتىپ العانى جانە قانشا ادام بىرنەشە كۇنگە بيلەت ساتىپ العانى تۋرالى سۇراۋىنا «جولاۋشىلار تاسىمالى» ا ق- دا مۇنداي دەرەكتەردى جيناۋ قيىن دەپ جاۋاپ بەردى. الايدا، جاقىن ارادا ۇلتتىق تاسىمالداۋشى جولاۋشىلار تۋرالى ستاتيستيكانى جيناي الۋ ءۇشىن ازاماتتاردىڭ مالىمەتتەر بازاسىن قوسۋ بويىنشا ادىلەت مينيسترلىگىمەن ىنتىماقتاستىقتى باستاۋدى جوسپارلاپ وتىر.
Kaz.tengritravel.kz
