ەش جەڭىلمەگەن قازاقستاندىق بوكسشى ەۋروپا چەمپيونى تيتۋلى ءۇشىن ايقاسادى

الماتى. قازاقپارات - 10-شىلدەدە الماتى قالاسىندا ۇلكەن بوكس كەشى ءوتىپ، سونىڭ اياسىندا رينگكە بۇرىن ەش جەڭىلىپ كورمەگەن قازاقستاندىق بوكسشى سۇلتان زاۋىربەك شىعادى، دەپ حابارلايدى قازاقپارات Sports.kz سايتىنا سىلتەمە جاساپ.

وتاندىق بوكسشىنىڭ قارسىلاسى ۇلى بريتانيا وكىلى رونني كلارك (21-4، 10 ك و) بولماق. BoxRec.com مالىمەتىنشە، كەزدەسۋ جەڭىمپازىنا WBO نۇسقاسى بويىنشا ەكىنشى جارتىلاي جەڭىل سالماقتا ەۋروپا چەمپيونىنىڭ تيتۋلى بەرىلەدى.

جەكپە- جەك ون راۋندتان تۇرادى. سۇلتان زاۋىربەكتىڭ سوڭعى ايقاسى وتكەن جىلدىڭ سوڭىندا الماتىدا وتكەن. وندا تورەشىلەردىڭ ءبىراۋىزدان قابىلداعان شەشىمىمەن ۋكراينا فايتەرى ۆلاديسلاۆ مەلنيكتى (12-3، 7 ك و) جەڭدى. اتاپ وتەيىك، بۇعان دەيىن قازاقستاندىق بوكسشى جاستار اراسىندا WBC نۇسقاسى بويىنشا وسى سالماق دارەجەسىندە الەم چەمپيونى تيتۋلىنا يە بولعان.