فۋتبولدان ەۋروپا چەمپيوناتى: يسپانيا جارتىلاي فينالعا شىقتى

نۇر- سۇلتان. قازاقپارات - بۇگىن فۋتبولدان ەۋروپا چەمپيوناتى جارتىلاي فينالىنا جولداما العان العاشقى قۇراما انىقتالدى، دەپ حابارلايدى قازاقپارات ءتىلشىسى.

شيرەك فينال ساتىسىندا بۇگىنگە ەكى ويىن جوسپارلانعان. العاشقىسىندا شۆەيتساريا مەن يسپانيا شەبەرلىك بايقاستى. ەكى قۇراما بۇعان دەيىن 24 مارتە كەزدەستى. ونىڭ 18 ىن دە يسپانيا باسىم ءتۇسىپ، 1 ىندە شۆەيتساريا جەڭسە، قالعانىندا تەڭ ەسەپ تىركەلدى.

2010 -جىلدىڭ 16- ماۋسىمىندا الەم چەمپيوناتى فينالدىق ساتىسىندا شۆەيتساريا اتالعان قارسىلاسىنان 1:0 ەسەبىمەن جەڭىلگەن بولاتىن. بۇگىنگى ويىندا شۆەيتساريالىق فۋتبولشىلار جەڭىسكە جەتۋ جولىن ىزدەدى. كەزدەسۋدىڭ باستاپقى كەزەڭىندە يسپانيالىق قۇراما بەلسەندىلىگى بايقالىپ تۇردى. ناتيجەسىندە 8-مينۋتتا ولاردىڭ تەپكەن دوبى شۆەيتساريالىق دەنيس زاكارياعا ءتيىپ، باعىتىن وزگەرتتى. وسىلايشا ولار وزدەرىنىڭ قاقپاسىنا اۆتوگول سوعىپ الدى.
ەكىنشى كەزەڭنىڭ 68-مينۋتىندا شۆەيتساريالىق شەردان شاكيري تارازى باسىن تەڭەستىرىپ كەتتى. بۇدان كەيىن ولاردىڭ قاتارىنان رەمو فرويلەر قىزىل قاعاز الىپ، الاڭنان قۋىلدى. شۆەيتساريا بۇدان كەيىن قورعانىسقا كەتكەن جوق. قولايلى ساتتەردە العا قاراي ۇمتىلدى. ويىننىڭ نەگىزگى كەزەڭىندە 1:1 ەسەبى تىركەلدى. كەزدەسۋ وۆەرتايمعا ۇلاستى. وۆەرتايمدا دا جەڭىمپاز انىقتالعان جوق.

پەنالتي سەرياسىندا يسپانيالىق فۋتبولشىلاردىڭ جولى بولىپ، جارتىلاي فينالعا شىقتى. ەندى ولار جارتىلاي فينالدا 6 شىلدەدە بەلگيا مەن يتاليا جۇبىنىڭ جەڭىمپازىمەن جاسىل الاڭعا شىعادى. بۇگىنگى تاعى ءبىر كەزدەسۋدە بەلگيا مەن يتاليا قۇرامالارى جاسىل الاڭعا شىعادى.

ويىن ەلوردا ۋاقىتىمەن 00.50-دە باستالىپ، «Qazaqstan» تەلەارناسىنان تىكەلەي ەفيردە كورسەتىلەدى. سونداي- اق، جارىستىڭ اتالعان ساتىسىندا 3-شىلدەدە چەحيا مەن دانيا، ۋكراينا مەن انگليا قۇرامالارى كەزدەسەدى.