كوۆيدتىڭ ۇندىلىك شتامى جاس تالعامايدى
دەنساۋلىق ساقتاۋ مينيسترلىگىنىڭ مالىمەتىنشە، ءۇندى شتامى ەلىمىزدىڭ بارلىق وڭىرىنە تاراۋى ىقتيمال. ماماندار ءۇندى شتامىنىڭ جاس تالعامايتىنىن ايتادى. كوۆيد- ءتىڭ وزگە مۋتاتسيالارىنا قاراعاندا جىلدام تارالادى. بالالار اراسىندا دەلتا شتامىن جۇقتىرۋ 5 ەسەگە جيىلەگەن. ياعني ۆيرۋس جاساردى. ءبىراق بالالاردا ينفەكتسيانىڭ قانشالىقتى اگرەسسيۆتى جۇرەتىنى ازىرگە بەلگىسىز. ال بۇل اۋرۋدى ەرەسەكتەر اراسىندا ءالى ۆاكسينا ەگىلمەگەن ادامدار جۇقتىرۋعا بەيىم.
ايناگۇل قۋاتبايەۆا، ق ر د س م قوعامدىق دەنساۋلىق ساقتاۋ ۇلتتىق ورتالىعى ءتوراعاسىنىڭ ورىنباسارى:
- ءۇندى شتامىنىڭ تارالۋ ىقتيمالدىعى بارلىق وڭىرلەردە بار ەكەنىن كورسەتە الامىز. ەڭ ءبىرىنشى ونىڭ تارالۋ جىلدامدىعى وتە جوعارى. 60 پروتسەنت جاعدايدا تەز تارالادى. جاسىرىن ينكۋباتسيالىق كەزەڭى ەكى ەسەگە دەيىن قىسقا. ءۇندى شتامىنا بايلانىستى ناۋقاستاردىڭ جاعدايى وتە اۋىر وتەتىندىگى كوبىنەسە مىنا اۋىز، ىشەك قۋىسى سيمپتوماتيكاسىنىڭ بەلگىلەرى، ونىڭ ىشىندە ءىش اۋرۋى، قۇسۋى جۇرەك اينۋ، اياق قولداعى قان تامىرلارىنىڭ ءتۇرلى ترومبوزدارىمەن سيپاتتالىپ وتىر.
دەلتا شتامى بالالار مەن جۇكتى ايەلدەر اراسىندا اۋىر ءوتۋى مۇمكىن. سوندىقتان العاشقى بەلگىلەرى بايقالا سالا دارىگەرگە جۇگىنگەن ءجون. بۇل ىندەت ۇساق تامىرلاردى زاقىمداپ، ترومبتاردىڭ پايدا بولۋىنا اكەلەدى. ءىش اۋىرىپ، تابەتتىڭ تومەندەۋى، قۇسۋ جانە جۇرەكتىڭ اينۋى بۇل ءۇندى شتامىنىڭ باستى بەلگىلەرى. اسىرەسە جۇرەك- قان تامىرلارى، تىنىس الۋ جۇيەسىنىڭ سوزىلمالى اۋرۋلارى بار ادامدار ساق بولۋى كەرەك.
ساۋلە اتىعايەۆا، قالالىق كوپ سالالى مەديتسينا ورتالىعى ديرەكتورىنىڭ ورىنباسارى:
- بۇل مۋتاتسيانىڭ بالالارعا دا تەز جۇعاتىنى انىقتالىپ وتىر. جالپى ۆيرۋس جاسارىپ بارادى. سوندىقتان جەتكىنشەكتەرگە ساق بولۋ كەرەك. ول ءۇشىن ەرەسەكتەر ۆاكتسينا ەگىلىپ، يممۋنيتەت قالىپتاستىرۋى قاجەت. دارىگەرلەردىڭ ايتۋىنشا، ۆاكتسينا العان ادامداردىڭ سانى ارتقان سايىن ۆيرۋس مۋتاتسياسىنىڭ تارالۋى دا باسەڭدەيدى.
سوندىقتان ىندەتتىڭ الدىن الۋ ءۇشىن ۇجىمدىق يممۋنيتەت قالىپتاستىرۋ قاجەت. سوندا عانا قاۋىپ سەيىلمەك. بۇگىنگە دەيىن الەمدە ۆاكتسينا العان ادامدار اراسىندا ءولىم- ءجىتىم تىركەلگەن جوق. ال دۇنيەجۇزىلىك دەنساۋلىق ساقتاۋ ۇيىمىنىڭ دەرەگى بويىنشا دەلتا شتامى وسى كۇنگە دەيىن الەمنىڭ 96 ەلىندە تاراعان.
اينۇر قۋات قىزى
www.24.kz
