نۇرسۇلتان نازاربايەۆ ەلوردانىڭ «جاسىل بەلدەۋىنىڭ» دامۋ بارىسىمەن تانىستى

نۇر-سۇلتان. قازاقپارات - ەلباسى ەلوردانىڭ «جاسىل بەلدەۋىن» تىكۇشاقپەن ارالاپ، قالا اينالاسىنداعى ورماندى القاپتىڭ دامۋ بارىسىمەن تانىستى، جىلداعى ءداستۇر بويىنشا تابيعي ورتاعا قىرعاۋىل ۇشىرۋ شاراسىنا قاتىستى.

بۇل تۋرالى قازاقپارات ەلباسىنىڭ رەسمي سايتىنا سىلتەمە جاساپ حابارلايدى.

قازاقستاننىڭ تۇڭعىش پرەزيدەنتى «جاسىل بەلدەۋ» وسى جىلدارى جايلى كليمات قالىپتاستىرۋعا جانە قالا ەكولوگياسىن جاقسارتۋعا ايتارلىقتاي اسەر ەتكەنىن اتاپ ءوتتى.

- العاش ەگىلگەن اعاشتار قازىر 20 مەترگە جەتىپ، قالىڭ ورمانعا اينالدى. وسىمدىكتەر مەن جانۋارلار دۇنيەسى بايىپ جاتىر. وسى ورماننىڭ ارقاسىندا جايلى كليمات قالىپتاسىپ، ەكولوگيا جاقسارىپ كەلەدى. مەن «جاسىل بەلدەۋدى» دامىتۋعا اتسالىسىپ جۇرگەن ادامدارعا ريزاشىلىعىمدى بىلدىرەمىن. ولاردىڭ ەڭبەگى جوعارى ماراپاتقا لايىق، - دەدى نۇرسۇلتان نازاربايەۆ.

ەلباسى ەلوردانى كوگالداندىرۋ جۇمىسىنا تۇركيا، قىتاي، ۆەنگريا جانە باسقا دا ەلدەردەن عالىمدار مەن ماماندار شاقىرىلعانىن ايتتى. سونداي-اق قالا ىشىندەگى ساياباق ايماقتارىن دامىتۋ جۇمىسىنا دا توقتالدى.

- وسى جىلدارى اتقارىلعان شارۋا جۇرتشىلىق تاراپىنان كەڭىنەن قولداۋ تاپتى. مۇندا ۆەلوسيپەد جولدارى سالىندى، بوس ۋاقىتتا دەمالۋعا قاجەت دۇنيەنىڭ ءبارى بار. تۇرعىندار جيدەك پەن ساڭىراۋقۇلاق تەرەدى، - دەدى قازاقستاننىڭ تۇڭعىش پرەزيدەنتى.

ەلباسى ەلوردانىڭ «جاسىل بەلدەۋىنە» ۇلتتىق ساياباق مارتەبەسىن بەرۋدى، وكىلەتتى ورگاندارعا قالا ماڭىنداعى جەرلەرگە تەكسەرىس جۇرگىزۋدى ۇسىندى. نۇرسۇلتان نازاربايەۆ ەلوردانى دامىتۋ بارىسىن قايتا قاراپ، شاھار اۋماعىنداعى بوس جاتقان جەرلەردە ءىشىنارا قۇرىلىس جۇرگىزۋگە كوشۋ قاجەتتىگىن ايتتى.

سونداي-اق قازاقستاننىڭ تۇڭعىش پرەزيدەنتى قورشاعان ورتانى ايالاۋدىڭ جانە بارشاعا ورتاق بايلىقتى كەلەشەك ۇرپاق ءۇشىن ساقتاۋدىڭ ماڭىزدى ەكەنىن اتاپ ءوتتى.

- تابيعاتتى ايالاپ، تازالىق ساقتاۋ قاجەت. اعاشتاردى ورتتەن قورعاپ، جويىلىپ كەتۋىنە جول بەرمەۋ كەرەك. مۇنىڭ ءبارى ءوزىمىزدىڭ بالالارىمىز ءۇشىن، كەلەر ۇرپاقتىڭ يگىلىگى ءۇشىن جاسالىپ جاتىر. ولار وسىنداي كەرەمەت سىي قالدىرعانىمىز ءۇشىن ءبىزدى ماقتان تۇتاتىن بولادى. تۋعان جەرگە دەگەن ماحاببات - قازاقستاندىق پاتريوتيزمنىڭ ماڭىزدى بولىگى. وسى ورايدا پرەزيدەنت قاسىم-جومارت توقايەۆتىڭ 2025-جىلعا دەيىن قازاقستاندا ەكى ميلليارد اعاش وتىرعىزۋ تۋرالى باستاماسىن قولدايمىن. بۇل ماڭىزدى ءارى جاۋاپتى ءىس. سول ارقىلى ءبىز ەلىمىزدى كوگالداندىرامىز. جاسىل جەلەك ەكولوگيانى جاقسارتادى جانە حالىقتىڭ دەنساۋلىعىن نىعايتۋعا قولايلى جاعداي تۋعىزادى، - دەدى ەلباسى.