توكيوعا جولداما العان سپورتشىلار قانشا كۇن كارانتينگە جاتقىزىلادى؟
كوميتەتتىڭ باس حاتشىسىنان ب ا ق وكىلدەرى توكيودان ناقتى قانشا مەدال كۇتۋگە بولاتىنىن سۇراعان بولاتىن.
«بۇكىل الەم قازىر پاندەميا جاعدايىندا تۇر. ءبىز قازىر سپورتشىلاردىڭ ءبارىن وقشاۋلاپ جاتىرمىز. ءبارى 14 كۇندىك كارانتينگە الىنادى. ويتكەنى وليمپيادانىڭ اشىلۋ سالتاناتىنا 20 كۇن عانا قالدى. ءبىزدىڭ قازىرگى مىندەتىمىز سپورتشىلارىمىز ۇتىپ العان ليتسەنزيالاردىڭ سانى بويىنشا تۇگەل توكيوعا جەتكىزۋ. توعيوعا بارعان سوڭ دا ولاردىڭ قاۋىپسىزدىگىن قامتاماسىز ەتەمىز. وسىدان كەيىن عانا بولجام ايتۋعا بولادى. سپورتتىڭ اتى - سپورت. قازىر ەشبىر سپورت تۇرىنەن 100 پايىز سەنىمدى بولجامدى كەسىپ ايتا المايسىڭ. تاعى ءبىر ماڭىزدى دۇنيە، كوماندا توكيوعا جەتكەن كەزدە عانا سپورتشىلاردىڭ كۇيى قانداي ەكەنىن كورە الامىز»، - دەدى اندرەي كريۋكوۆ.
ۇلتتىق وليمپيادا كوميتەتىنىڭ باس حاتشىسى توكيودان جۋرناليستەرگە كونتەنت ۇسىنۋ ماسەلەسى ءالى تولىق ايقىندالماعانىن دا اتاپ ءوتتى.
ويتكەنى حالىقارالىق وليمپيادا كوميتەتى مەن جاپونيا تاراپى شەتەلدىك جۋرناليستەردىڭ كەلۋىن قاتتى شەكتەپ وتىر.
«جۋرناليستەرمەن دە سول كەزدە تىعىز جۇمىس ىستەيمىز. ءبىز ارنايى باعدارلاما دايىنداپ قويدىق. حالىقارالىق وليمپيادا كوميتەتى دە، توكيو بيلىگى دە جۋرناليستەردىڭ سپورتشىلارمەن ارالاسۋىن قاتتى شەكتەگەنىن بىلەسىزدەر. بۇرىن باسپا ءسوز ورتالىعىن ۇيىمداستىرىپ، سپورتشىلارمەن كوزبە-كوز بايلانىسا الساق، قازىر بۇل مۇمكىن ەمەس. جۋرناليستەرمەن جۇمىس قالاي جۇرەتىنىن قازىر اشىپ ايتا المايمىز. كونتەنتتى قالاي الاتىنىمىزدى دا ايتا المايمىز»، - دەيدى كوميتەت وكىلى.
وسىنىڭ ءبارىن ەسكەرگەن ۇلتتىق وليمپيادا كوميتەتى توكيودان تاراتىلاتىن كونتەنتتى بارلىق ب ا ق وكىلدەرىن olympic.kz پورتالى ارقىلى ۇسىنۋدى جوسپارلاپ وتىر.
«olympic.kz پورتالى ارقىلى بۇكىل كونتەنت جۋرناليستەر ءۇشىن قولجەتىمدى بولادى. مۇنداي ءبىرىنشى رەت بولعالى وتىر. ويتكەنى سپورتشىلارعا قول جەتكىزۋ مۇمكىن بولمايىن دەپ تۇر. قۇرعاق جاڭالىق كوشىرىپ تاراتۋ مەن سپورتشىنى تىكەلەي اڭگىمەگە تارتۋ ارقىلى كونتەنت تاراتۋ ەكى بولەك دۇنيە ەكەنىن تۇسىنەمىز»، - دەدى اندرەي كريۋكوۆ.
