مينيسترلىك قازاقستاندىق سپورتشىلار بيىلعى وليمپياداعا نەگە از ليتسەنزيا العانىن ءتۇسىندىردى

نۇر-سۇلتان. قازاقپارات - ۇلتتىق وليمپيادا كوميتەتىنىڭ باس حاتشىسى اندرەي كريۋكوۆ توكيو وليمپيداسىنا قاتىساتىن سپورتشىلاردىڭ نەگە از ەكەنىن ءتۇسىندىردى، دەپ حابارلايدى قازاقپارات.

«96 ليتسەنزيا بويىنشا، جالپى ليتسەنزيا جۇيەسى قالاي ەكەنىن تۇسىندىرە كەتكىم كەلەدى. بىلەتىن شىعارسىزدار، توكيوداعى XXXII جازعى وليمپيادا ويىندارىنا قاتىساتىن سپورتشىلاردىڭ سانى ريوداعى ويىندارعا قاراعاندا 10 پايىز از. حالىقارالىق وليمپيادا كوميتەتىنىڭ ءتۇرلى سەبەپتەرمەن بۇلايشا قىسقارتۋى بۇكىل ىرىكتەۋ كەزەڭىندە ءجۇردى. بۇل قازاقستان ءۇشىن ريو وليمپياداسىنا قاراعاندا 33 سپورتشىعا از بولىپ وتىر»، - دەى ول ورتالىق كوممۋنيكاتسيالار قىزمەتىندە ءوتىپ جاتقان بريفينگىدە.

كوميتەت وكىلى ليتسەنزيا سانى بۇعان دەيىنگى وليمپيادا ويىندارىنداعىدان از بولعانىمەن، وتاندىق سپورتشىلار مەدالعا تالاساتىن سپورت تۇرلەرى كوبەيگەنىن اتاپ ءوتتى.

«مىسالى، ريودا اۋىر اتلەتيكادان 8 سپورتشى قاتىسسا، قازىر ەكى ادام قاتىسقالى وتىر. وسىنشا كۆوتا بەرىلگەندىكتەن ونى كەڭەيتۋ مۇمكىن بولمادى. نەمەسە ريودا بوكستان تۇتاس كوماندا سايىسقا تۇسسە، بيىل ىرىكتەۋ تۋرنيرلەرى قىسقارتىلعاندىقتان ليتسەنزيا سانى از بولىپ تۇر. حالىحاقارالىق بوكس فەدەراتسياسى ىرىكتەۋ تۋرنيرلەرىن بىرنەشە سەبەپتەر بويىنشا قايتا جانداندىرا المادى.

وسىلايشا ليتسەنزيالار قىسقاردى. اتىس، ەسكەك ەسۋ سياقتى باسقا سپورت تۇرلەرىنەن دە ديستسيپلينالار قىسقاردى. بۇل وزگەرىس بىزگە عانا ەمەس، بارشا ەلدەرگە اسەر ەتتى. سوندىقتان ابسوليۋتتى ساندارعا بايلانىپ قالۋدىڭ قاجەتى جوق دەپ ويلايمىن. ودان دا الەمدىك سپورتتاعى جاعدايعا قاراۋ كەرەك. كاسىبي مامان رەتىندە سايىسقا باراتىن قازىرگى كوماندا وتە مىقتى ەكەنىن ايتا الامىن»، - دەدى اندرەي كريۋكوۆ.