فۋتبولدان ەۋروپا چەمپيوناتى: بۇگىنگى ويىنداردى قايدان كورۋگە بولادى

نۇر-سۇلتان. قازاقپارات - بۇگىن فۋتبولدان ەۋروپا چەمپيوناتى شيرەك فينالىندا ەكى ويىن وتكىزىلەدى، دەپ حابارلايدى قازاقپارات ءتىلشىسى.

شيرەك فينال ويىندارى 2 جانە 3-شىلدە كۇندەرىنە بەلگىلەنگەن. بۇگىن - ەكى، ەرتەڭ ەكى جۇپ ءوزارا شەبەرلىك بايقاسادى. جارىستىڭ اتالعان ساتىسىندا العاشقى كەزدەسۋ شۆەيتساريا مەن يسپانيا قۇرامالارى اراسىندا بولادى.

ويىن ەلوردا ۋاقىتىمەن 21.50-دە باستالىپ، «Qazaqstan» مەن «Qazsport» تەلەارنالارىنان تىكەلەي ەفيردە كورسەتىلەدى. كەزدەسۋ رەسەيدىڭ سانكت- پەتەربۋرگ قالاسىنداعى «گازپروم- ارەنا» ستاديونىندا وتكىزىلەدى. ويىندا انگليالىق مايكل وليۆەر باس قازى قىزمەتىن اتقارادى.

ەكى قۇراما بۇعان دەيىن 24 مارتە كەزدەستى. ونىڭ 18-دە يسپانيا باسىم ءتۇسىپ، 1-دە شۆەيتساريا جەڭسە، قالعانىندا تەڭ ەسەپ تىركەلدى. 2010 -جىلدىڭ 16-ماۋسىمىندا الەم چەمپيوناتى فينالدىق ساتىسىندا شۆەيتساريا اتالعان قارسىلاسىنان 1:0 ەسەبىمەن جەڭىلگەن بولاتىن. ەسكە سالساق، جارىستىڭ 1/8 فينالىندا يسپانيا حورۆاتيانى، شۆەيتساريا فرانسيانى ورتا جولدا قالدىرىپ كەتتى.

بۇگىنگى تاعى ءبىر كەزدەسۋدە بەلگيا مەن يتاليا قۇرامالارى جاسىل الاڭعا شىعادى. ويىن ەلوردا ۋاقىتىمەن 00.50-دە باستالىپ، «Qazaqstan» تەلەارناسىنان تىكەلەي ەفيردە كورسەتىلەدى. ويىن گەرمانيانىڭ ميۋنحەن قالاسىنداعى «اليانس- ارەنا» ستاديونىندا وتكىزىلىپ، وندا سلوۆەنيالىق سلاۆكو ۆينچيچ باس تورەشى قىزمەتىن اتقارادى.

ەكى قۇراما بۇعان دەيىن 22 مارتە كەزدەستى. ونىڭ 4 دە بەلگيا باسىم ءتۇسىپ، 14 دە يتاليا جەڭسە، قالعانىندا تەڭ ەسەپ تىركەلدى.

سوڭعى رەت بەلگيا يتاليانى 2015 -جىلدىڭ 13-قاراشاسىندا جولداستىق كەزدەسۋدە 3:1 ەسەبىمەن جەڭگەن بولاتىن. سونداي-اق، جارىستىڭ اتالعان ساتىسىندا 3-شىلدەدە چەحيا مەن دانيا، ۋكراينا مەن انگليا قۇرامالارى كەزدەسەدى.

ايتا كەتەيىك، 1/8 فينالدا بەلگيا پورتۋگاليانى، يتاليا اۆستريانى ورتا جولدا قالدىرىپ كەتتى.

اۆتور: ءادىلجان ۇمبەت