الاياقتىقتىڭ تاعى ءبىر ءتۇرى شىقتى

نۇر-سۇلتان. قازاقپارات - ەلوردا ساقشىلارى كوپبالالى انالاردى الداۋمەن اينالىسىپ كەلگەن توپتىڭ ۇستىنەن تەرگەۋ باستادى، دەپ حابارلايدى قازاقپارات.

نۇر-سۇلتان قالاسى پوليتسيا دەپارتامەنتى باسپا ءسوز قىزمەتىنىڭ حابارلاۋىنشا، كوپبالالى انالاردى الەۋمەتتىك تولەم تۋرالى جالعان حابارمەن الداپ كەلگەن شىمكەنت قالاسىنىڭ ەكى تۇرعىنىن ۇستالعان. 24 جاستاعى جىگىت پەن قىز ەلوردا تۇرعىندارىنا قوڭىراۋ شالىپ، وزدەرىن حالىققا قىزمەت كورسەتۋ ورتالىعىنىڭ الەۋمەتتىك تولەمدەر ءبولىمىنىڭ قىزمەتكەرى رەتىندە تانىستىرىپ وتىرعان. سەنىمگە كىرگەننەن كەيىن ولار مەملەكەت كوپبالالى انالارعا الەۋمەتتىك تولەم جاساپ جاتقانىن ايتىپ قۋانتقان.

ول ءۇشىن كوپبالالى انا «الەۋمەتتىك تولەمنىڭ %10 مولشەرىندە ايىپپۇل بەرەشەگىن تولەۋى قاجەت» بولعان. الدانعان انالار ورتا جولدا اينىپ كەتپەس ءۇشىن كۇدىكتىلەر ايىپپۇلدى تولەۋ ءۇشىن جەكە سوت ورىنداۋشىلارى پالاتاسىنىڭ قىزمەتكەرىنە حابارلاسۋ كەرەكتىگىن ايتىپ، جالعان نومىرلەر ۇسىنعان. اقشا اۋدارىلاتىن شوت سول ءنومىر ارقىلى بەرىلگەن. وپىق جەگەن انالار اقشا اۋدارعاننان كەيىن كۇدىكتىلەر نومىرلەرىن اۋىستىرىپ وتىرعان.

«الاياقتاردىڭ سحەماسىنا ەلوردالىق كوپبالالى ەكى انا ۇرىنىپ، جالعان شوتتارعا 40 مىڭ تەڭگەدەن اقشا اۋدارعان. قازىر كۇدىكتىلەردىڭ ۇستىنەن قىلمىستىق كودەكستىڭ 190-بابى (الاياقتىق) بويىنشا تەرگەۋ باستالدى. ايىپ دالەلدەنسە، ولار 4 جىلعا دەيىن باس بوستاندىعىنان ايىرىلۋى مۇمكىن»، - دەپ جازىلعان دەپارتامەنتتىڭ دەرەگىندە.

پوليتسيا قازىر قوماقتى الەۋمەتتىك كومەك تۇسكەنى تۋرالى الدامشى اقپاراتتار كوبەيگەنىن، سونىڭ دەنى الاياقتىق سحەمالار جاساۋ ءۇشىن تاراتىلاتىنىن ەسكەرتەدى.

«ادەتتە ءوزىن حالىققا قىزمەت كورسەتۋ ورتالىعىنىڭ قىزمەتكەرى رەتىندە تانىستىراتىن قاسكۇنەمدەردىڭ الداۋىنا تۇسەتىندەر كوپ. مۇنداي الاياقتىقتىڭ كەيبىر بەلگىلەرى:

- قالىپتى ابونەنتتىك نومىردەن قوڭىراۋ شالۋ؛

- ءتولقۇجات دەرەكتەرىن سۇراۋ؛

- تۇسىنىكسىز ايىپپۇلدار بويىنشا بەرەشەك بار ەكەنىن ايتىپ بوپسالاۋ؛

- بوگدە نومىردەن SMS كودىن جىبەرۋ، (1414 ەمەس)؛

- اقشا اۋدارۋ قاجەت شوتتاردى ۇسىنۋ»، - دەلىنگەن پوليتسيا مالىمەتىندە.

نۇر-سۇلتان قالاسى پوليتسيا دەپارتامەنتى وسىنداي ارەكەتتەردىڭ قۇربانى بولماۋ ءۇشىن مىناداي قاراپايىم ساقتىق شارالارىن ۇستانۋدى ۇسىنادى:

- ح ق ك و قىزمەتكەرىنىڭ اتى-ءجونىن، فيليالدىڭ مەكەنجايىن ءبىلىپ، ح ق ك و- نىڭ رەسمي نومىرىنەن قوڭىراۋ شالۋدى سۇراڭىز؛

- ەگەر بەيتانىس ادام ءسىزدىڭ جەكە كۋالىگىڭىزدىڭ سۋرەتىن جىبەرىپ، ءتۇپنۇسقانى كورسەتۋدى سۇراسا، سەنۋگە اسىقپاڭىز. ح ق ك و قىزمەتكەرلەرى كليەنتتەرگە ەشقاشان قوڭىراۋ شالمايدى، بارىنشا جاقىن ورنالاسقان ح ق ك و بولىمىنە جۇگىنۋدى سۇرايدى؛

- جەكە سوت ورىنداۋشىسىنىڭ اتى-ءجونىن ءبىلىپ، ونى رەسمي سايتتان تابۋعا بولاتىن تىزىمنەن تەكسەرىڭىز.

اۆتور: ەسىمجان ناقتىباي