پرەمەر-ءمينيستردىڭ ورىنباسارى «سارى» ايماقتاعى وڭىرلەردە كارانتيندى كۇشەيتۋدى تاپسىردى

نۇر-سۇلتان. قازاقپارات - بۇگىن ق ر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن ق ر اۋماعىندا كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆ ا ك) وتىرىسى ءوتتى، دەپ حابارلايدى قازاقپارات.

شارا بارىسىندا دەنساۋلىق ساقتاۋ ءمينيسترى الەكسەي سوي «دەلتا» شتامىنا ءتان COVID-19 مۋتاتسياسى انىقتالعاننان كەيىن قازاقستانداعى اعىمداعى ەپيدەميولوگيالىق جاعداي تۋرالى باياندادى. ەپيداحۋالدىڭ ۋشىعۋىنا بايلانىستى ۆيتسە-پرەمەر وبلىس اكىمدىكتەرىنە «سارى» ايماقتا ورنالاسقان وڭىرلەردە كۇشەيتىلگەن شەكتەۋ شارالارىن قابىلداۋدى تاپسىردى.

پرەمەر-ءمينيستردىڭ ورىنباسارى ەل بويىنشا ۆاكسينالاۋدىڭ جوعارى قارقىنىنا قاراماستان، بۇگىندە ماڭعىستاۋ، اتىراۋ جانە باتىس قازاقستان وبلىستارىندا جۇرگىزىلىپ جاتقان جۇمىس بەلسەندىلىگىنىڭ تومەن ەكەنىن اتاپ ءوتتى. سونداي- اق اكىمدىكتەرگە ءموبيلدى بريگادالاردىڭ شىعۋىن ۇيىمداستىرۋ ارقىلى اۋىل تۇرعىندارىن ۆاكسينالاۋ جۇمىستارىن كۇشەيتۋ تاپسىرىلدى. سونىمەن قاتار ەرالى توعجانوۆ مونيتورينگىلىك توپتاردىڭ جۇمىسىن كۇشەيتۋدى تاپسىردى، اسىرەسە الماتى، اتىراۋ جانە سولتۇستىك قازاقستان وبلىستارىندا بەلسەندەندىرۋ قاجەت.

«Ashyq» جوباسىنا قاتىساتىن بيزنەس سۋبەكتىلەرىنىڭ قىزمەتىنە جۇرگىزىلگەن مونيتورينگ قورىتىندىسىنا سايكەس «اتامەكەن» ۇ ك پ ۇسىنىسى بويىنشا كەلۋشىلەردىڭ مارتەبەسىن تەكسەرمەيتىن 464 نىساندى جۇيەدەن 2 اپتاعا الىپ تاستاۋ تۋرالى شەشىم قابىلداندى.

بۇدان بولەك، اكىمدىكتەرگە كەلۋشىلەردىڭ تىم از سانى تەكسەرىلەتىن 2,4 مىڭنان استام «Ashyq» قاتىسۋشىلارىن تەكسەرۋ تاپسىرىلدى.

ۆ ا ك وتىرىسىندا ىشكى ىستەر مينيسترلىگىنىڭ ءبىرىنشى ورىنباسارى مارات قوجايەۆ پ ت ر- تەستىلەردى قولدان جاساۋ جانە وتكىزۋ فاكتىلەرى بويىنشا جىل باسىنان بەرى پوليتسيا ورگاندارى 23 قىلمىستىق ءىس، ال جالعان ۆاكسيناتسيا پاسپورتتارىن پايدالانۋ فاكتىلەرى بويىنشا 4 قىلمىستىق ءىس قوزعالعانىن باياندادى.

ەرالى توعجانوۆ ىشكى ىستەر مينيسترلىگىنە پ ت ر- تەست ناتيجەلەرىن جانە ۆاكسيناتسيا پاسپورتتارىن قولدان جاساۋمەن اينالىساتىن ادامداردى انىقتاۋ جانە جاۋاپكەرشىلىككە تارتۋ بويىنشا جۇمىستى كۇشەيتۋدى تاپسىردى. جاڭا وقۋ جىلىنا ءداستۇرلى فورماتتا دايىندالۋ ماقساتىندا ۆ ا ك ءتوراعاسى وڭىرلەردىڭ اكىمدىكتەرىنە ءبىلىم بەرۋ مەكەمەلەرىن الدىن الا دايىنداپ، قويىلاتىن سانيتاريالىق تالاپتارعا سايكەستىگىن تەكسەرۋ قاجەتتىگىن ايتتى. وتىرىس سوڭىندا پرەمەر- ءمينيستردىڭ ورىنباسارى وزگە دە ءبىرقاتار ماڭىزدى تاپسىرمالار بەردى.