جاپونداردىڭ ۇزاق ءومىر ءسۇرۋىنىڭ قۇپياسى نەدە؟
قازىر جاپونيادا ورتاشا ءومىر ءسۇرۋ ۇزاقتىعى 84,2 جاستى قۇرايدى. بۇل ەكونوميكالىق ىنتىماقتاستىق جانە دامۋ ۇيىمىنىڭ (ە ى د ۇ) دەرەكتەرى بويىنشا الەم ەلدەرى ىشىندە ەڭ جوعارى كورسەتكىش. مىسالى قازاقستانداعى ورتاشا ءومىر ءسۇرۋ ۇزاقتىعى 72,9 جاس، ياعني جاپونيادان 10 جىلعا از.
مۇنىڭ قۇپياسى نەدە؟ جاپونداردىڭ تاماقتانۋ جانە ءومىر ءسۇرۋ سالتى قانداي؟
جاپونداردىڭ تاماقتانۋ سالتى وكيناۆا ديەتاسىنا نەگىزدەلىپ قالىپتاسقان. وكيناۆا - قۇرامىندا جۇزدەگەن شاعىن ارالى بار جاپونيانىڭ وڭتۇستىك پرەفەكتۋراسى. ول الەمنىڭ "كوگىلدىر ايماقتارى" تىزىمىنە ەنگىزىلگەن. ياعني الەم حالقىمەن سالىستىرعاندا تۇرعىندارىنىڭ ءومىر جاسى ۇزاق جانە ءومىر ءسۇرۋ ساپاسى جوعارى ايماقتار قاتارىنا ەنگەن.
جاپون ديەتاسى نەگىزىنەن وسىمدىك تاعامدارىنان، سويا جانە تەڭىز ونىمدەرىنەن تۇرادى. جاپوندار باتىس ەلدەرىنىڭ ازاماتتارىنا قاراعاندا تۇز بەن قانتى كوپ سۋسىنداردى از تۇتىنادى. كانادزاۆا مەديتسينا ۋنيۆەرسيتەتىنىڭ دوكتورى دايسۋكە كويا اسقازاندى تەك 70 پايىزعا دەيىن عانا تولتىرۋ كەرەك ەكەنىن ايتادى. عالىم ديەتا نەگىزىن تويىپ جەمەۋ ارقىلى «ۇزاق ءومىر ءسۇرۋ گەنىن» (قارتايۋعا قارسى تۇرتىن قاسيەتى بار SIRT1 گەنى) بەلسەندى ەتۋگە باعىتتالعان دەپ تۇسىندىرەدى. دارىگەر ويى بەلگىلى گەرونتولوگ دەۆيد سينكلەردىڭ پىكىرىمەن ۇندەس، ول دا دۇرىس تاماقتانۋ ارقىلى قارتايۋدى باياۋلاتۋعا بولاتىنىن ايتادى.
وكيناۆا ديەتاسى شىنىمەن دە ۇزاق ءومىردىڭ نەگىزى مە؟
ارينە، ادامنىڭ نە جەپ، نە ىشەتىنى ونىڭ دەنساۋلىعىنا اسەر ەتپەي قويمايدى. دەسە دە كوپتەگەن عالىم ازىق- تۇلىك حالىقتىڭ ۇزاق ءومىر سۇرۋىنە مۇمكىندىك بەرەتىن جالعىز نارسە ەمەس ەكەنىن العا تارتادى.
مىسالى جاپونيادا 60- جىلداردان باستاپ جەدەل ەكونوميكالىق ءوسۋ بايقالدى، بۇل ءومىر ساپاسى مەن دەنساۋلىق ساقتاۋ جۇيەسىن ەداۋىر جاقسارتتى. وعان قوسا بۇل ۇلت تاريحىندا قالىپتاسقان تازالىق ساقتاۋ مادەنيەتى مەن جەكە گيگيەنا، دەنساۋلىق تۋرالى جالپى ۇلتتىق تۇسىنىك تە ماڭىزدى ءرول اتقاردى. ونىڭ ۇستىنە، جاپون قارتتارى زەينەتكە شىققاننان كەيىن دە كوبىنە بەلسەندى ءومىر سالتىن ۇستانا بەرەدى. جانىنا راحات سىيلايتىن سۇيىكتى ىسىمەن اينالىسادى نەمەسە قوعامدىق جۇمىستار جاسايدى.
وسىلايشا ولار ءومىرىنىڭ ءمانى، ياعني ءوزى ءۇشىن انىقتاعان يكيگايى نەگىزىندە عۇمىر كەشىپ، ىشكى گارمونيا ارقىلى ۇزاق جاسايدى.
massaget.kz
