ەلىمىزدىڭ ءۇش قالاسىندا قوقىس سۇرىپتايتىن زاۋىت ىسكە قوسىلادى

نۇر-سۇلتان. قازاقپارات - «و ك م وپەراتورى» كۇزگە دەيىن وسكەمەن، سەمەي، اقتوبە قالالارىندا قوقىس سۇرىپتايتىن زاۋىت اشۋدى جوسپارلاپ وتىر دەپ حابارلايدى قازاقپارات.

«و ك م وپەراتورى» ج ش س باسقارما ءتوراعاسى مەدەت قۇمارعاليەۆ جاڭارتىلاتىن ەنەرگيا جانە قالدىقتاردى قايتا وڭدەۋ جونىندەگى 5-ەۋرازيالىق بيزنەس- فورۋمىندا وسىنداي مالىمەت ايتتى.

«بىلتىر ءبىز ەكولوگيا، گەولوگيا جانە تابيعي رەسۋرستار مينيسترلىگىمەن بىرگە شىعىس قازاقستاننىڭ ەكى قالاسىنىڭ، اقتوبە وبلىسىنىڭ ءبىر قالاسىنىڭ ماتەريالدىق- تەحنيكالىق جابدىقتاۋ جوباسىن پيلوتتىق رەجيمدە قولعا العان بولاتىنبىز. وسكەمەن قالاسىنا 6 قوقىس جينايتىن كولىك پەن 1,5 مىڭ قوقىس كونتەينەرى، سەمەي قالاسىنا 6 كولىك پەن 1274 كونتەينەر، اقتوبە قالاسىنا 6 كولىك پەن 1800 كونتەينەر ساتىپ الىپ بەردىك. ونىڭ ۇستىنە 7 ميلليون ەۋروعا قوقىس سۇرىپتايتىن 3 زاۋىت ساتىپ الدىق. وعان قاجەت اقشا «وكم وپەراتورى» ۋتيل الىمىنان جيناعان قاراجات ەسەبىنەن الىندى»، - دەدى سەرىكتەستىك باسشىسى.

ونىڭ ايتۋىنشا، اتالمىش سۇرىپتاۋ جەلىلەرى ءۇش قالانىڭ اكىمدىكتەرىنىڭ بالانسىنا بەرىلگەن. ءبىراق، قولدانىسقا بەرۋ مەرزىمى كەشىگەتىن ءتۇرى بار.

«وكىنىشكە قاراي، بىزدە قالدىقتى ورتالىقتاندىرىلعان تاسىلمەن جيناۋدىڭ ينفراقۇرىلىمى دۇرىس قالىپتاسپاعان. ءبىز سۇرىپتاۋ جەلىسىن جەتكىزىپ بەرگەنىمەن، ول ورناتىلاتىن عيماراتتىڭ جوبالۋ- سمەتالىق قۇجاتتارى ءالى بىتپەگەن. جوسپار بويىنشا قوقىس سۇرىپتايتىن زاۋىتتار وسكەمەندە 29-تامىزدا، سەمەيدە 30-تامىزدا، اقتوبەدە 1-قازاندا ىسكە قوسىلۋى كەرەك»، - دەدى مەدەت قۇرمانعاليەۆ.