جاڭا اكىمشىلىك كودەكس داۋ-دامايدا ءالسىز تاراپتى قورعايدى - قانات مۋسين
«بۇگىن - ەلىمىز ءۇشىن تاريحي كۇن. سەبەبى، اكىمشىلىك راسىمدىك- پروتسەستىك كودەكس بۇگىننەن باستاپ كۇشىنە ەنەدى. وسىلايشا ەلىمىزدە جاڭا سالا - اكىمشىلىك ادىلەت جۇيەسى ىسكە قوسىلادى. سىزدەر ەلىمىزدە ازاماتتىق، قىلمىستىق، اكىمشىلىك قۇقىق بۇزۋشىلىقتار بويىنشا سوت ءىسىن جۇرگىزۋدىڭ 3 ءتۇرى بار ەكەنىن جاقسى بىلەسىزدەر. جاڭا كودەكستىڭ قولدانىسقا ەنۋىمەن سوت ءىسىن جۇرگىزۋدىڭ ءتورتىنشى ءتۇرى - اكىمشىلىك سوتتار جۇمىس ىستەي باستايدى»، - دەدى قانات مۋسين ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سپيكەر الەم ەلدەرىندە شەنەۋنىكتەردى تارتىپكە شاقىراتىن ارنايى جۇيە قۇرىلعانىن اتاپ ءوتتى. «مۇنى اكىمشىلىك ادىلەت دەپ اتايمىز. اكىمشىلىك ادىلەتتىڭ ميسسياسى - بيلىك ورگاندارىمەن داۋ- دامايدا ءالسىز تاراپتى قورعاۋ. مىسالى، بىرەۋ اكىمدىكتىڭ شەشىمىمەن كەلىسپەيدى.
ول قايدا بارادى؟ ارينە، سوتقا بارادى. ال، سوت ول داۋدى وسى كۇنگە دەيىن ازاماتتىق پروتسەستىك كودەكستىڭ تارتىبىمەن قاراپ كەلدى.
ول كودەكستىڭ ەرەكشەلىگى - بىرىنشىدەن، ەكى تاراپ تەپە-تەڭ. سوت پروتسەسى جارىسپالى تۇردە وتەدى. كىمنىڭ دالەلى مىقتى، كىم سوتتى بارىنشا سەندىرەدى، سول داۋدى جەڭىپ شىعادى. ەكىنشىدەن، سول اكىمنىڭ شەشىمى دۇرىس ەمەستىگىن سوت پروتسەسىندە ارىز يەسىنىڭ ءوزى دالەلدەۋى ءتيىس. ال، جاي ادام مەن كاسىپكەردى قولىندا بيلىگى بار ورگانمەن سالىستىرۋعا بولا ما؟ ارينە، بولمايدى. مەملەكەتتىك ورگاننىڭ زاڭگەرلەرى بار، مۇمكىندىگى كوپ. سوندىقتان ونداي داۋلاردىڭ كوبىسى قالاي اياقتالاتىنىن ءبارىمىز جاقسى بىلەمىز. وعان دالەل - ستاتيستيكا. داۋلاردىڭ %85 مەملەكەتتىك ورگانداردىڭ پايداسىنا شەشىلىپ كەلدى. ارينە، وسىلاي بولعان سوڭ سوتتارعا، جالپى بيلىككە جۇرتتىڭ وكپەسى قارا قازانداي»، - دەيدى ق. مۋسين.
ال جاڭا كودەكس بويىنشا داۋلار مۇلدەم باسقا پرينتسيپتەرمەن قارالادى.
«مۇندا تاراپتار تەڭ ەمەس. سوت ارىز يەسى رەتىندە جەكە ازاماتقا نەمەسە كاسىپكەرگە بارىنشا كومەكتەسەدى. سول اكىمدىكتىڭ شەشىمى زاڭدى ما، زاڭسىز با، ونى ەندى تالاپكەر دالەلدەمەيدى. سول شەشىمدى قابىلداعان اكىمدىكتىڭ ءوزى ونىڭ زاڭدىلىعىن، قاجەتتىلىگىن، نەگىزدىلىگىن دالەلدەۋى ءتيىس»، - دەپ ءتۇسىندىردى قانات مۋسين.
