ساياسي تاعدىرىمدى بايگەگە تىكتىم: نۇرسۇلتان نازاربايەۆتىڭ سۇحباتىنا نەگىزدەلگەن دەرەكتى فيلم
ەلباسى سۇحباتىندا ەلوردانىڭ وتكەنى مەن بولاشاعى تۋرالى ساۋالدارعا جاۋاپ بەردى، دەپ حابارلايدى قازاقپارات ءتىلشىسى.
«ەل استاناسىن ورتالىققا كوشىرۋ تۋرالى شەشىمدى قابىلداۋ وڭاي بولعان جوق. كوپشىلىك قارسى بولدى. رەسپۋبليكا استاناسى رەتىندە قاراستىرعان قالالار تىزىمىندە الماتى، اقتوبە، ءوزىم جيىرما جىل قىزمەت ەتكەن قاراعاندى بار ەدى. ءبىراق قازىرگى شەشىمىمە وكىنبەيمىن. استانا ەلدىڭ باسىن بىرىكتىرگەن ۇلكەن شاھارعا اينالدى. جوسپار بويىنشا 500-600 مىڭ تۇرعىنى بار اكىمشىلىك قالا بولۋى ءتيىس ەدى، ءبىراق قالانىڭ ءومىرىن توقتاتۋعا بولمايتىنىن تۇسىندىك»، - دەدى ەلباسى جۋرناليست ءلاززات تانىسبايعا بەرگەن سۇحباتىندا.
سۇحباتتا ن. نازاربايەۆ ساياسي تاۋەكەلدەرگە بارۋ سەبەپتەرىن، سونىمەن بىرگە ەلوردا حالقىنىڭ بولاشاقتاعى شەكتى سانى، كەلەشەكتە قالا تۇرعىندارىنا جاسالاتىن يگىلىكتەر مەن قالا قۇرىلىسىنا قاتىستى جاڭا جوسپارلار تۋرالى باياندايدى. جوبادا قازاقستاندىق ساۋلەتشىلەر، قالاداعى ەرەكشە نىسانداردى سالۋعا اتسالىسقان امانجول چيكانايەۆ، سەرىك رۋستامبەكوۆ، بايعۇتتى تورتايەۆ، بريتانيالىق ارحيتەكتور نورمان فوستەردىڭ سۇحباتتارى بار.
«Qazaqstan» تەلەارناسى باسپا ءسوز قىزمەتىنىڭ مالىمەتىنشە، دەرەكتى فيلم 5-شىلدە كۇنى ساعات 20:00-دە ەفيرگە شىعادى.
