جەدەل جاردەم كولىگى جول اپاتىنا ءتۇستى: زارداپ شەككەندەر بار

پەتروپاۆل. قازاقپارات - سولتۇستىك قازاقستان وبلىسىندا جەدەل جاردەم مەن جەڭىل كولىك سوقتىعىستى. ءۇش ادام زارداپ شەكتى، دەپ حابارلايدى قازاقپارات ءتىلشىسى.

جول- كولىك وقيعاسى ورنىندا تۇسىرىلگەن ۆيدەو الەۋمەتتىك جەلىدە تارادى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وقيعا بۇگىن ساعات 5.20 شاماسىندا قىزىلجار اۋدانى پەتەرفەلد ەلدى مەكەنىنىڭ ماڭىندا بولعان. جولدا پەتروپاۆلعا بارا جاتقان جەدەل جاردەم مەن «اۋدي» كولىگى سوقتىعىستى. سالدارىنان ارنايى كولىكتەگى ءبىر جولاۋشى مەن جەڭىل كولىكتەگى ەكى ادام جاراقاتتاندى.

«اۋديدە» بولعان مامليۋتكا قالاسىنىڭ تۇرعىنى، 58 جاستاعى ەر ادام اۋرۋحاناعا جاتقىزىلدى. جەدەل جاردەمدەگى 28 جاستاعى جۇكتى كەلىنشەك تە مەديتسينالىق مەكەمەگە جەتكىزىلدى. ارنايى كولىك ونى پەريناتالدىق ورتالىققا اپارا جاتقان. قازىر وقيعا ورنىندا قىزىلجار اۋدانى پوليتسيا ءبولىمىنىڭ جەدەل تەرگەۋ توبى جۇمىس ىستەۋدە. سوتقا دەيىنگى تەرگەۋ بارىسىندا ءتارتىپ ساقشىلارى ءىستىڭ ءمان-جايىن انىقتايتىن بولادى. ءتيىستى ساراپتامالار وتكىزىلمەك.

اۆتور: اقەركە داۋرەنبەك قىزى