د د س ۇ كوروناۆيرۋسقا قارسى ءارتۇرلى ۆاكسينانى ارالاستىرىپ سالماۋعا كەڭەس بەرەدى

نۇر-سۇلتان. قازاقپارات - دۇنيەجۇزىلىك دەنساۋلىق ساقتاۋ ۇيىمى كوروناۆيرۋسقا قارسى بەلگىلى ءبىر ۆاكسينانىڭ عانا ەكى دوزاسىن الۋعا كەڭەس بەرەدى. بۇل تۋرالى د د س ۇ يممۋنيزاتسيا ءبولىمىنىڭ باسشىسى كەيت و'برايەن مالىمدەدى.

«بىزدە ەكى ءتۇرلى ۆاكسينا سالۋ كەزىندە يممۋندىق رەاكسيا ساقتالاتىنى نەمەسە ونىڭ قاۋىپسىزدىگى تۋرالى مالىمەتتەر ازىرگە جوق. ەكى دوزا سالۋ قاجەت كەزدە ەكەۋىندە دە تەك ءبىر ۆاكسينانى قولدانۋدى ۇسىنامىز»، - دەپ اتاپ ءوتتى ساراپشى.

سونىمەن قاتار و'برايەن ۇيىمنىڭ AstraZeneca ۆاكسيناسىنىڭ العاشقى دوزاسىنان كەيىن Pfizer/BioNTech ۆاكسيناسىنىڭ ەكىنشى دوزاسىن سالۋدى ماقۇلدايتىندىعىن ءتۇسىندىردى، ويتكەنى مۇندا ارالاس يممۋنداۋدىڭ دالەلى بار.

www.24.kz