قۇلاققاپپەن اۋەن تىڭداۋدىڭ زيانى

نۇر-سۇلتان.قازاقپارات - قۇلاققاپپەن اۋەن تىڭداعاندى ءبارى ۇناتادى. ءسوزسىز زاماناۋي ونەرتابىس. قۇلاققاپ تاعىپ سۇيىكتى اۋەندى توقتاۋسىز تىڭداۋعا بولادى.

ءارى بىرەۋگە كەدەرگى كەلتىرمەيسىڭ. اۋەنمەن جالعىز قالۋعا مۇمكىندىك بار. الايدا اۋەندى ۇنەمى قۇلاققاپپەن تىڭداۋ قۇلاققا زيان ەكەنىن بىلەسىز بە؟

زەرتتەۋشىلەردىڭ ايتۋىنشا، بۇل قۇلاق ەستىمەۋ، قۇلاق كەمىستىگى سىندى دەرتكە اكەلەدى. اسىرەسە قۇلاققاپپەن اۋەندى ءجيى تىڭدايتىن، كوبىنە داڭعىرلاتىپ قويىپ اۋەن تىڭدايتىن بالالار مەن جاسوسپىرىمدەردىڭ قۇلاق اۋرۋى ەرتە باستالۋى مۇمكىن.

ا ق ش ۇلتتىق دەنساۋلىق ساقتاۋ ۇيىمىنىڭ نۇسقاۋلىعىندا دىبىس پەن اۋەننىڭ داۋىسى 70 دەتسيبەلدەن اسپاعانى ءجون دەپ كەڭەس بەرىلگەن. ياعني اۋەندى بۇدان ارتىق داۋىسپەن تىڭداۋعا بولمايدى.

ال قۇلاققاپ شىعاراتىن داۋىستىڭ دەڭگەيى 70 دەتسيبەلدەن اسىپ كەتەدى. بارابان دىبىسىنىڭ دىڭعارىمەن بىردەي. بۇل ادام قۇلاعىنا زيان.

قۇلاقتىڭ ورتاڭعى بولىگىندە سىرتتان كەلگەن دىبىستى ازايتىپ نە كوبەيتىپ، رەتتەپ وتىراتىن بۇلشىقەت بار. ەگەر سىرتتاعى دىبىس ءالسىز بولسا، ونى قۇلاق ەستىپ، مي قابىلداۋ ءۇشىن زورايتىپ، قاتتى دىبىستى، قۇلاق زارداپ شەكپەس ءۇشىن ازايتىپ وتىرادى.

ال قۇلاققاپپەن اۋەن مەن دىبىستى ءجيى تىڭداۋ وسى بۇلشىقەتتى شارشاتىپ جىبەرەدى. سودان قۇلاقتى قاتتى دىبىستان قورعاي الماي قالادى دا، قۇلاق اۋرۋى باستالادى.

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، 12-35 جاس ارالىعىنداعى الەم حالقىنىڭ 50 پايىزى قۇلاق اۋرۋىنا شالدىققان. وعان سەبەپ - تارس- تۇرس اۋەن مەن داڭعىرلاق دىبىس.

مامانداردىڭ ايتۋىنشا، بۇل - اۋقىمدى ماسەلە. ويتكەنى قۇلاعى كەمىس ادامنىڭ قارتايۋى دا قاتار جۇرەدى. ياعني قۇلاعى ەستىمەگەن سايىن، ميدىڭ اقپارات قورىتۋى مەن ويلاۋ جۇيەسى ناشارلاپ، مۇنداي ادام ەرتە دەمەنتسياعا ۇشىرايدى. قارتايۋى كۇشەيەدى. بۇعان كوبى ءمان بەرمەيدى. ويتكەنى قۇلاق اۋىرعانى نە ناشار ەستىگەنى بۇل تابيعي نارسە نە جاس كەلە پايدا بولاتىن كەمشىلىك ەمەس.

عالىمداردىڭ ەسەبىنشە، قازىرگى 40 جاستاعى ادامداردىڭ قۇلاق ەستۋى بۇرىنعى 70-80 جاستاعى قارتتاردىڭ قۇلاق ەستۋىمەن بىردەي.

قۇلاعى ەرتە جاستان ناشارلاعان ادامنىڭ كارتايۋى دا ەرتە باستالادى.

ادامنىڭ قۇلاعى ۋاقىت كەلە ەمەس، اياق استىنان بۇزىلۋى دا مۇمكىن. ياعني، قۇلاققاپپەن كۇندە تىڭداپ جۇرسەم عانا قۇلاعىم كەميدى دەسەڭىز، قاتەلەسەسىز. قۇلاققا كەلگەن زيان جينالا- جينالا، ءبىر مەزەتتە ۋشىعىپ كەتۋى مۇمكىن.

ال قۇلاقتى امان ساقتايمىن دەسەڭىز مىنا كەڭەستى ەستە ۇستاڭىز:

اينالاداعى شۋ مەن دىبىستى 70 دەتسيبەلدەن اسىرماڭىز؛

شۋلى جەردە جۇرسەڭىز، قۇلاقتى بىتەپ الىڭىز؛

قۇلاق سىر بەرسە، بىردەن دارىگەرگە قارالعان ءجون؛

دارىگەرگە ءجيى- ءجيى قارالىپ تۇرىڭىز.

massaget.kz