گرەك ريم كۇرەسىنەن توكيو وليمپياداسىندا ەل نامىسىن كىمدەر قورعايدى

نۇر-سۇلتان. قازاقپارات - گرەك ريم كۇرەسىنەن توكيو وليمپياداسىندا ەل نامىسىن كىمدەر قورعايتىنى بەلگىلى بولدى، دەپ حابارلايدى قازاقپارات ءتىلشىسى.

ۇلتتىق وليمپيادا كوميتەتى حابارلاعانداي، توكيوداعى جازعى وليمپيادا ويىندارىندا گرەك-ريم كۇرەسى بويىنشا قازاقستان ۇلتتىق قۇراما كومانداسىنان ءۇش بالۋان قاتىسادى.

اتاپ وتەتىن بولساق، 60 كەلى سالماقتا ميرامبەك ايناعۇلوۆ، 77 كەلى سالماقتا ەل نامىسىن دەمەۋ جادىرايەۆ قورعايدى. ال 87 كەلى سالماقتا نۇرسۇلتان تۇرسىنوۆقا ءۇمىت ارتامىز.

وسى ورايدا ايتا كەتەيىك، گرەك ريم كۇرەسىنەن جولداما سپورتشىعا ەمەس، كومانداعا بەرىلەدى. قازاقستاندىق گرەك-ريم كۇرەسىنىڭ شەبەرلەرى ليتسەنزيالىق جارىستاردان ءۇش سالماق بويىنشا جولداما جەڭىپ العان بولاتىن.

توكيو وليمپياداسىنا ۇلتتىق قۇرامانى گرەك-ريم كۇرەسىنەن باس باپكەر باقتيار بايسەيىتوۆ باستاپ بارادى.