قازاقستان پرەزيدەنتى شۆەيتساريانىڭ ءبىرقاتار كومپانياسىنىڭ باسشىلارىن قابىلدادى

نۇر-سۇلتان. قازاقپارات - شۆەيتساريانىڭ ىسكەرلىك توپتار وكىلدەرىمەن وتكەن كەزدەسۋدەن كەيىن مەملەكەت باسشىسى ءبىرقاتار كومپانيانىڭ جەتەكشىلەرىمەن جەكە-جەكە كەزدەسۋ وتكىزدى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

Stadler Rail AG حولدينگى ديرەكتورلار كەڭەسىنىڭ ءتوراعاسى پەتەر شپۋلەرمەن وتكەن كەزدەسۋدە كولىك سالاسىنداعى ينۆەستيتسيالىق جوبالاردى جۇزەگە اسىرۋدىڭ پەرسپەكتيۆالارى، سونداي-اق، قازاقستان-شۆەيتساريا ىسكەرلىك كەڭەسىنىڭ كەزەكتى وتىرىسىن وتكىزۋگە بايلانىستى ماسەلەلەر تالقىلاندى.

Glencore International AG كومپانياسىنىڭ باس ديرەكتورى ايۆان گلازەنبەرگ قاسىم-جومارت توقايەۆقا «قازمىرىش» ج ش س- ءىن ودان ءارى دامىتۋ جونىندەگى كومپانيانىڭ جوسپارلارى، سونىڭ ىشىندە، جايرەم كەن بايىتۋ كومبيناتىنداعى پوليمەتال رۋدالارىن وڭدەيتىن زاۋىتتىڭ قۇرىلىسى تۋرالى مالىمەت بەردى.

مەملەكەت باسشىسى شىعىس قازاقستان وبلىسىنداعى ەكولوگيالىق احۋالدى جاقسارتۋ ءۇشىن وزىق تەحنولوگيالاردى ەنگىزۋدىڭ ماڭىزدى ەكەنىن ايتتى.

قاسىم-جومارت توقايەۆ جاقىن ارادا قىزمەتىنەن كەتەتىن ايۆان گلازەنبەرگكە قازاقستاننىڭ تاۋ-كەن سالاسىن دامىتۋعا قوسقان ۇلەسى ءۇشىن ريزاشىلىعىن ءبىلدىردى جانە كەزدەسۋگە قاتىسىپ وتىرعان گەري نەيگلگە تابىس تىلەدى. گەري نەيگل ايۆان گلازەنبەرگتىڭ ورنىنا كومپانيانى باسقارادى.

F. Hoffmann-La Roche AG فارماتسيەۆتيكالىق كومپانياسىنىڭ باسقارما ءتوراعاسى كريستوف فرانتسپەن كەزدەسۋ كەزىندە بىرلەسكەن جوبالاردى جۇزەگە اسىرۋ مۇمكىندىكتەرى، سونىڭ ىشىندە، COVID-19 ىندەتىن جانە باسقا دا ءارتۇرلى اۋرۋلاردى زەرتتەۋ جونىندەگى عىلىمي-زەرتتەۋ لابوراتورياسىن اشۋ ماسەلەسى ءسوز بولدى.