وليمپياداعا العاش قوسىلعان سپورت تۇرىنەن توكيوعا باراتىن جالعىز قازاقستاندىق سپورتشى كىم؟
وتانداسىمىز ريشات حايبۋللين اتالمىش جارىستا ەل نامىسىن قورعايتىن سپورتشىلاردىڭ ءبىرى. بۇل كۇندەرى ەۋروپاداعى الەم كۋبوگىنە قاتىسىپ جاتقان ريشات Vesti.kz تىلشىسىمەن دايىندىعىمەن ءبولىستى.
الپينيزم - بىرنەشە سپورت تۇرلەرىنەن نەگىزىن سالعان. اتاپ ايتقاندا سپورتتىق قۇزعا ورمەلەۋ، سكي-الپينيزم، مۇزعا ورمەلەۋ جانە سكايرانينگ.
- ريشات، الدىمەن بۇل سپورتقا قالاي كەلگەنىڭىزدى ايتىپ بەرسەڭىز
- بۇل سپورتقا 6 جاسىمدا اكەم الىپ كەلدى. ول كىسى ەڭبەگى سىڭگەن، تاجىريبەسى مول الپينيست. حالىقارالىق دارەجەدەگى سپورت شەبەرى. سودان بەرى ۇزدىكسىز اينالىسىپ كەلەمىن. وتباسىمىزدا مەنەن دە باسقا باۋىرلارىم وسى سپورت تۇرىمەن اينالىسادى.
- وليمپيادا جولداماسىن قاشان ۇتىپ الدىڭىز؟
- وليمپيادا جولداماسىن 2019-جىلى كۇنشىعىس ەلىندە وتكەن الەم كۋبوگىندە «جىلدامدىق»، «بوۋلدەرينگ» جانە «قيىندىق» ساناتتارىنىڭ كوپسايىسىندا قولا جۇلدەنى جەڭىپ الدىم. ناتيجەسىندە ءتورت جىلدا ءبىر كەلەتىن جازعى ويىندارعا باراتىن مۇمكىندىككە يە بولدىم. قازىرگى تاڭدا اۋستريا مەن شۆەيتساريادا الەم كۋبوگىنە قاتىسىپ جاتىرمىن. ەۋروپادا سوڭعى دايىندىقتى پىسىقتاپ 27-شىلدە وليمپيادا استاناسىنا اتتانامىز.
- ءبىزدىڭ ەلىمىزدە اتالمىش سپورت ءتۇرى قانشالىقتى دامىعان؟
- ءبىزدىڭ ەلىمىزدە بۇل سپورت تۇرىمەن اينالىساتىنداردىڭ سانى ارتىپ كەلەدى. مەملەكەت تاراپىنان دا قولداۋ بار. ماسەلەن ەلىمىزدەگى كوپتەگەن ساۋدا- ورتالىقتارىندا قۇزعا ورمەلەۋ كەشەندەرى سالىنىپ جاتىر. دەگەنمەن سالىستىرمالى تۇردە الەمنىڭ باسقا ەلدەرىنەن اناعۇرلىم ارتتا قالعانىمىز راس. ءبىزدىڭ ماقساتىمىز - سولاردىڭ دەڭگەيىنە جەتۋ.
- الەم كۋبوگىندەگى ناتيجەڭىز قانداي بولىپ جاتىر؟
- ينسبۋركتە «قيىندىق» كاتەگورياسىندا سىنعا ءتۇستىم. نەگىزى مەن «جىلدامدىق» ساناتىندا ءوزىمدى ەركىن سەزىنەمىن. دەگەنمەن وليمپيادا ويىندارىندا جەڭىمپاز كوپسايىس، ياعني «جىلدامدىق»، «قيىندىق» جانە «بوۋلدەرينگ» كاتەگوريالارى بويىنشا انىقتالادى. سوندىقتان بۇل جولى جاتتىعۋ رەتىندە اسا كۇش سالماي ونەر كورسەتتىم. ناتيجەسىندە 101 سپورتشىنىڭ اراسىنان 38-ورىن الدىم. بار كۇشىمدى وليمپيادا ويىندارىندا سالىپ، بارشا قازاقستاندىق جانكۇيەردى قۋانتۋعا تىرىسامىن.
