الماز شارمان: ۆاكسينا الۋدىڭ نە ءۇشىن قاجەت ەكەنىن تۇسىنبەيتىندەر كوپ
«مەن بۇل ماسەلەگە جەكە ادامنىڭ قۇقىعى تۇرعىسىنان ەمەس، قوعامدىق دەنساۋلىق ساقتاۋ ءتۇرعىسىنان قاراۋ كەرەك دەپ ويايمىن. بۇل ىستە قوعامنىڭ قۇقىعى ىسكە قوسىلىپ وتىر. مىندەتتى ۆاكسيناتسيا دەپ اتاساق، مۇنداي ءتاسىل الەمنىڭ وزگە ەلدەرىندە دە بار. مىسالى، ا ق ش- تىڭ ميچيگان شتاتىندا اۋرۋحانانىڭ بۇكىل مەديتسينالىق پەرسونالى ۆاكسينا الۋعا مىندەتتەلگەنى تۋرالى حابار تارادى. كاليفورنيا شتاتىندا دا وسىنداي جاعداي بولىپ جاتىر. كەيبىر ەلدەر لوتورەيا ويناتىپ جاتىر. مەنىڭ ويىمشا، وندا تۇرعان ەشقانداي تاڭعالاتىن دۇنيە جوق. ءتىپتى دۇرىس دەپ ەسەپتەيمىن. وتكەنى ۆاكسينا الۋدىڭ نە ءۇشىن قاجەت ەكەنىن ناقتى تۇسىنبەيتىندەر كوپ»، - دەيدى پروفەسسور.
يممۋنولوگتىڭ ايتۋىنشا، كورونۆيرۋستى ايتارلىقتاي جەڭىل وتكەرىپ جاتقاندار بار.
«بۇل ۆيرۋستىڭ ەڭ قاۋىپتىلىگى وسى جەرىندە. ۆيرۋس جۇقتىرعانداردىڭ جارتىسىنا جۋىعى ونى ەشبىر سيمپتومسىز وتكەرەدى. ءسويتىپ ءجۇرىپ ونداي ادامدار ماڭايىنداعىنىڭ بارىنە اۋرۋ جۇقتىرادى. ال ولاردىڭ ىشىندە يممۋنيتەتى السىزدەر الگى سيمپتومسىز اۋىرعان ادامنىڭ سەبەپكەر بولۋىمەن كوز جۇمۋى مۇمكىن. سوندىقتان ۆاكسينالاۋ ماسەلەسىندە جەكە ادامنىڭ قۇقىعىنان قوعامنىڭ مۇددەسى جوعارى تۇر. مىندەتتى ۆاكسيناتسيا - قوعامنىڭ قۇقىعىن قورعاۋ دەپ بىلەمىن» - دەگەن ساراپشى ۆاكسينالاۋدىڭ ماڭىزى تۋرالى مىسال كەلتىردى.
«ءدامحاناعا ۆاكسينا الماعان 4 ادام كەلدى دەيىك. داياشى ۆيرۋستى سيمپتومسىز وتكەرىپ جۇرگەن بولسا، تورتەۋىنە دە اۋرۋ جۇقتىرۋى مۇمكىن. ونىڭ بىرەۋى ءتىپتى رەانمياتسياعا ءتۇسىپ، ءومىرىن قاۋىپ ءتونۋى ىقتيمال. مۇنداي جاعدايدا كىمنىڭ قۇقىعىن ءبىرىنشى كەزەكتە قورعاۋىمىز كەرەك؟ ۆاكسينا الۋدان باس تارتقان داياشىنىڭ قۇقىعىن قورعاۋ ماڭىزدى ما، الدە ءدامحاناعا تاماقتانۋ ءۇشىن كەلەتىن تۇرعىنداردىڭ قاۋىپسىزدىك قۇقىعى ماڭىزدى ما؟ بۇل مىسال مىندەتتى ۆاكسيناتسيا تاماقتانۋ، قىزمەت كورسەتۋ سالاسىنا عانا قاتىستى بولۋ كەرەك دەگەن ءسوز ەمەس. ويتكەنى قازىر قولىمىزداعى جالعىز قارۋ - ۆاكسينا»، - دەدى امەريكا دەنساۋلىق ساقتاۋ قاۋىمداستىعىنىڭ مۇشەسى.
اۆتور: ەسىمجان ناقتىباي
