التاي كولگىنوۆ: قازىر ەپيدەميولوگيالىق جاعداي كۇردەلى

نۇر-سۇلتان. قازاقپارات - نۇر-سۇلتان قالاسىنىڭ اكىمى التاي كولگىنوۆ قالاداعى ەپيدەميولوگيالىق جاعدايدىڭ قيىنداي تۇسكەنىن ايتتى، دەپ حابارلايدى قازاقپارات ءتىلشىسى.

«قازىر ەپيدەميولوگيالىق جاعداي كۇردەلى كۇيىندە قالىپ وتىر. ماۋسىم ايىنىڭ باسىندا اۋرۋ جۇقتىرۋ سانى تومەندەگەن ەدى، تاۋلىگىنە شامامەن 100-110 جاعداي انىقتالاتىن جانە «قىزىل» ايماقتان شىعۋىمىز كەرەك ەدى. ءبىراق «دەلتا» شتامى پايدا بولىپ، قازىر اۋرۋ كۇرت وسكەنىن بايقاپ وتىرمىز. بۇگىن 678 جاعداي تىركەلىپ وتىر. سانيتارلىق دارىگەرلەر قوسىمشا شەكتەۋ شارالارىن قابىلدادى. بۇل ءماجبۇرلى شارا. ءبىز دەنساۋلىق ساقتاۋ جۇيەسىن ايتارلىقتاي جاڭعىرتتىق»، - دەدى ا. كولگىنوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا، قالاداعى 14 ستاتسيوناردا 2 مىڭ توسەك-ورىن بولسا، ونىڭ %75 ىندا ناۋقاستار جاتىر.

«كۇن سايىن نۇر-سۇلتان ستاتسيونارلارىنا 200 گە جۋىق ناۋقاس تۇسەدى. زەرتحانا سانى 2 دەن 27 گە دەيىن ۇلعايتىلدى. پاندەميا باسىندا تەست كوپ جۇرگىزىلمەيتىن، ال قازىر تاۋلىگىنە 10 مىڭعا دەيىن تەست جاسالادى»، - دەدى ەلوردا اكىمى.

اۆتور: ايجان سەرىكجان قىزى