كوروناۆيرۋس جۇقتىرعان ناۋقاستار «جاسارىپ» كەلەدى - ساۋلە اتىعايەۆا
بۇل تۋرالى كوپبەيىندى مەديتسينالىق ورتالىق ديرەكتورىنىڭ ورىنباسارى ساۋلە اتىعايەۆا ورتالىق كوممۋنيكاتسليالار قىزمەتىندە ايتتى، دەپ حابارلايدى قازاقپارات ءتىلشىسى.
«30-ماۋسىمداعى جاعداي بويىنشا پاندەميا باستالعاننان بەرى نۇر-سۇلتان قالاسىندا 64723 كوروناۆيرۋس ينفەكسياسىنىڭ جاعدايى تىركەلدى. 678 جاڭا جاعداي تىركەلىپ وتىر. ستاتسيونارلاردىڭ دايىندىعىنا كەلسەك، 2001 توسەگى بار 14 ستاتسيونار جۇمىلدىرىلىپ وتىر. ينفەكتسيالىق ستاتسيونارلاردىڭ جۇكتەلىمى سوڭعى ءبىر ايدا ايتارلىقتاي ءوسىپ، 75 پايىزعا جەتتى. كوروناۆيرۋس ينفەكتسياسى راستالعان دياگنوزبەن 1340 پاتسيەنت جاتىر. رەانيماتسيا بولىمشەلەرىندە 119 ەمدەلۋشى ەم الۋدا. ونىڭ ىشىندە 23 ەمدەلۋشى اسا اۋىر جاعدايدا بولعاندىقتان، جاساندى وكپە جەلدەتكىشىنە جالعاندى. 3750 ناۋقاس امبۋلاتوريالىق باقىلاۋعا الىندى»، - دەدى ورتالىق ديرەكتورىنىڭ ورىنباسارى.
كوپبەيىندى مەديتسينالىق ورتالىق وكىلى سوڭعى 5-ايداعى ەپيدەميولوگيالىق ستاتيستيكاعا تالداۋ جاساعاندارىن ايتادى.
«5 اي ىشىندە امبۋلاتوريالىق رەجيمدە 30 مىڭنان استام ادام ەمدەلدى. وسىنىڭ ارقاسىندا ينفەكتسيالىق ستاتسيونارلاردىڭ جۇكتەلىمىن ءبىرقالىپتى ۇستاپ تۇرا الدىق. بۇگىنگە دەيىن سولاي بولىپ كەلدى. ۆيرۋس ينفەكتسياسىنىڭ «جاسارعانىن» كورىپ وتىرمىز. سوڭعى 5 اي مەن ماۋسىمنىڭ 25 كۇنىندەگى سىرقاتتانۋ دەرەكتەرىن تالداي وتىرىپ، ءساۋىر ايىمەن سالىستىرعاندا نەعۇرلىم جاس ادامداردىڭ اۋرۋحاناعا ءتۇسىپ جاتقانىن اڭعاردىق. 30-40 جاس ارالىعىنداعى ادامدار ستاتسيونارعا ءجيى تۇسەتىن بولدى» ، - دەدى ساۋلە اتىعايەۆا. ونىڭ ايتۋىنشا، ساۋىرمەن سالىستىرعاننىڭ وزىندە ماۋسىمدا رەانيماتسياعا تۇسكەندەردىڭ جاسى ءبىر ايعى كورسەتكىشتەن 10 جاسقا كىشى بولىپ شىققان. وسىنىڭ اسەرىنەن رەانيماتسيالىق توسەكتەردىڭ جۇكتەلىمى 65 پايىزعا دەيىن ارتقان.
«بۇگىندە قايعىلى جاعدايلاردىڭ ءساۋىر ايىنا قاراعاندا 5 جىلعا «جاسارعانىن» كورىپ وتىرمىز. ياعني قورىتىندىلاساق، ءقازىر كوروناۆيۋرس ينفەكسياسىنىڭ كلينيكالىق اعىسى وزگەرىسكە ۇشىراپ جاتىر دەۋگە بولادى. وكپەنىڭ زاقىمدالۋى دا بۇرىنعىدان جىلدام قارقىنمەن جۇرەتىنىن بايقاپ وتىرمىز. كوپيۋتەرلىك توماگرافياعا تۇسكەن كەزدە 5-10 پايىز زاقىممەن تۇسكەن پاتسيەنتتەردە 3-4 كۇننىڭ ىشىندە ەمدىك شارالارعا قاراماستان 60-70 پايىز زاقىمدالۋ كەزدەسىپ جاتىر»، - دەدى مامان.
سونداي-اق، ول وكپەنىڭ زاقىمدالۋىنان بولەك، مي مەن جۇرەكتىڭ، بۇيرەك پەن اسقازان- ىشەك جۇيەسىنىڭ، بۋىندار مەن جۇيكە جۇيەسىنىڭ زاقىمدالۋى سياقتى سيندرومدار دا جيىلەگەنىن اتادى. «ەستۋدەن قالۋ سيندرومدارى كەزدەسىپ جاتىر. وسىنىڭ بارىنەن قورعانۋدىڭ ەڭ ءتيىمدى ءارى جالعىز جولى ۆاكتسيناتسيا دەگەن قورىتىندىعا كەلۋگە بولادى»، - دەدى ساراپشى.
